مرکزی جرمنی کے شہر میگڈیبرگ میں ایک کار سوار شخص نے کرسمس مارکیٹ میں خریداری کیلئے موجود ہجوم پر کارچڑھادی، واقعے میں ایک جاں بحق جبکہ 60 سے زائد افراد زخمی ہوگئے۔
خبر ایجنسی کے مطابق جرمن حکام کی جانب سے ایک شخص کی ہلاکت کی تصدیق نہیں کی گئی تاہم علاقائی حکومت کے ترجمان نے واقعے کو حملہ قرار دیا ہے۔
جرمن میڈیا کے مطابق مقامی حکومتی ذرائع نے بتایا ہے کہ پولیس نے واقعے میں ملوث کار کے ڈرائیور کو حراست میں لے لیا ہے، جبکہ کرسمس مارکیٹ بند کردی گئی اور ایمرجنسی سروسز موقع پر موجود ہیں۔
واقعے کے بعد میگڈیبرگ روانہ ہونے سے قبل جرمنی کی ریاست سیکسونی انہالٹ کے پریمیئر رائنر ہیزلوف نے کہا کرسمس سے چند دن پہلے یہ واقعہ بہت ہی خوفناک ہے۔
برلن کے مغرب میں واقع میگڈیبرگ شہر 2 لاکھ 24 ہزار آبادی پر مشتمل ہے اور یہ ریاست سیکسونی انہالٹ کا دارالحکومت ہے۔
جرمن حکام کا کہنا ہے کہ کرسمس بازار پر حملے میں ملوث گرفتار شخص سعودی شہری اور ڈاکٹر ہے، وہ 2006 سے جرمنی میں رہائش پذیر تھا۔