انڈونیشیا نے خام تیل سےبھرا ایرانی آئل ٹینکر قبضے میں لے لیا

جکارتہ(شوریٰ نیوز) انڈونیشیا نے خام تیل سےبھرا ایرانی آئل ٹینکر قبضے میں لے لیا،ایرانی آئل ٹینکر میں 30 کروڑ ڈالر کا 2 لاکھ 73 ہزار ٹن خام تیل موجود ،انڈونیشین حکام نے کہا ہےکہ یہ تیل بردار جہاز بلا اجازت تیل کسی دوسرے بحری جہاز میں منتقل کرنےکے شبےمیں قبضےمیں لیا گیا ہے۔ انڈونیشین حکام کے مطابق ایرانی جہاز میں موجود تیل کی قیمت تقریباً 30 کروڑ ڈالر ہے۔ انڈونیشین میری ٹائم سکیورٹی ایجنسی کے سربراہ کا کہنا ہےکہ تیل بردار جہاز کا خودکار نظام جہاز کی موجودگی بحیرہ احمر میں دکھا رہا تھا جب کہ جہاز حقیقت میں انڈونیشیا کی بحری حدود میں تھا، اس سے جہاز کے عملے کی بدنیتی ظاہر ہوتی ہے۔ جہاز سے خام تیل بھی سمندر میں گرایا گیا جو کہ ہمارے بحری قانون کی خلاف ورزی ہے۔ جہاز میں مصری کپتان سمیت عملےکے 28 افراد موجود ہیں، ان کے علاوہ 3 مسافر بھی ہیں جو کہ جہاز پر موجود ایک سکیورٹی افسر کے گھر والے ہیں۔