امریکا نے صیہونی وزرا کی جانب سے فلسطینیوں کوغزہ سے نکل جانے کے بیان کی مذمت کرتے ہوئے کہا ہے کہ غزہ فلسطینی سرزمین ہے اور رہے گی۔
ترجمان امریکی محکمہ خارجہ میتھیوملر نے کہا کہ صیہونی وزرا کا بیان اشتعال انگیز اورغیرذمہ دارانہ ہے، حماس کا اب کوئی مستقبل نہیں، کوئی دہشتگردگروپ اب صیہونی حکومت کیلئے خطرہ نہیں۔
دوسری جانب صیہونی فوج نے غزہ میں حملوں میں تیزی لاکر رہائشی علاقوں، پناہ گزین کیمپوں اور اسپتالوں کے اطراف شدید بمباری کرتے ہوئے چوبیس گھنٹوں میں 200 سے زائد فلسطینی شہید کر دیے۔
صیہونی فوج نے غزہ شہر میں حماس کے انٹیلی جنس ہیڈ کوارٹر پر قبضہ کرنے کا بھی دعویٰ کردیا ہے۔
صیہونی افواج نے غزہ میں جاری لڑائی میں طوالت لانے کیلئے ہزاروں فوجیوں کو غزہ سے نکالنا شروع کر دیا ہے۔
ادھر مقبوضہ مغربی کنارے میں بھی صیہونی حکومت مظالم میں کوئی کمی نہ آ سکی ہے، صیہونی فوج نے مغربی کنارے میں مزید پانچ فلسطینیوں کو شہید کردیا۔
صیہونی فوج نے لبنان میں حزب اللہ کے ٹھکانوں اور شام میں فوجی تنصیبات پر بھی حملے کیے۔
دوسری جانب فلسطینی مزاحمتی گروپوں نے چار دنوں میں 70 سے زیادہ صیہونی ٹینک اور فوجی گاڑیاں تباہ کردیں جبکہ مزاحمت کاروں کے ہاتھوں متعدد مورچہ بند صیہونی فوجی بھی ہلاک ہوئے۔
غزہ کیلئے امدادی سامان لے کر پاکستان کا طیارہ مصر پہنچ گیا، 20 ٹن امدادی سامان غزہ پہنچانے کیلئے مصری ہلال احمر کے حوالے کر دیا گیا ۔