صیہونی فوج نے مہاجرین کے کیمپ پر چھاپے کے دوران 4 فلسطینیوں کو شہید کردیا۔
فلسطینی وزارت صحت نے صیہونی فوج کے ہاتھوں 4 فلسطینیوں کی شہادت کی تصدیق کرتے ہوئے کہا کہ صیہونی فوج نے مقبوضہ مغربی کنارے کے شہر طوباس میں فارعہ کے مہاجرین کیمپ پر چھاپہ مارا جس دوران فائرنگ سے 4 فلسطینیوں کو شہید کردیا۔
عرب میڈیا کے مطابق صیہونی فورسز نے غزہ میں گھروں پر بھی حملے کیے جہاں شجاعیہ اور دیگر علاقوں میں شیلنگ کی گئی۔
رپورٹس کے مطابق اس سے قبل جبالیہ اور نصیرت کے کیمپوں پر بھی حملے کیے گئے جس میں متعدد افراد شہید ہوگئے۔
امریکی وزیر دفاع صیہونی حکومت پہنچ گئے
علاوہ ازیں امریکی وزیر دفاع لائیڈ آسٹن صیہونی حکومت پہنچ گئے ہیں جہاں وہ صیہونی حکومت کے ساتھ غزہ میں جاری فوجی آپریشن پر بات چیت کریں گے۔
میڈیا رپورٹس کے مطابق امریکی وزیر دفاع کا صیہونی حکومت کا دورہ عالمی برادری کے دباؤ کے تناظر میں دیکھا جارہا ہے جس میں صیہونی حکومت کے غزہ پر وحشیانہ حملوں پر سوال اٹھائے جارہے ہیں۔
واضح رہے کہ صیہونی حکومت کی غزہ پر 7 اکتوبر سے جاری بمباری کے نتیجے میں اب تک 18 ہزار سے زائد فلسطینی شہید ہوگئے ہیں جن میں بڑی تعداد بچوں اور خواتین کی شامل ہے۔