غزہ میں صیہونی مظالم کے خلاف دنیا بھر میں بڑے پیمانے پر احتجاجی مظاہروں کا سلسلہ جاری ہے۔
انڈونیشیا کے دارالحکومت جکارتا میں امریکی سفارت خانے کے باہر سینکڑوں مظاہرین نے احتجاجی مظاہرہ کرتےہوئے غزہ میں نسل کُشی بند کرنے کا مطالبہ کیا۔
آسٹریلیا کے شہر میلبرن میں بھی فلسطینیوں سے اظہار یکجہتی کیلئے فلسطینی پرچم تھامے مظاہرین نے اسٹیٹ لائبریری سے پارلیمنٹ کی جانب مارچ کیا۔
صیہونی فوج کے ہاتھوں غزہ میں تین صیہونی یرغمالیوں کی ہلاکت کے بعد صیہونی حکومت کے خلاف تل ابیب میں بھی احتجاجی مظاہروں میں شدت آگئی، مظاہرین نے یرغمالیوں کی رہائی کیلئے فوری معاہدے کا مطالبہ کردیا۔
ادھر شمالی لندن میں احتجاجی ریلی کے دوران مظاہرین صیہونی سفیر کے گھر کے سامنے پہنچ گئے جہاں انہوں نے فلسطین آزاد کرو اور غزہ میں جنگ بند کرو کے نعرے لگائے۔
سوئیڈن میں بھی فلسطین کے حق میں احتجاج کیا گیا اور دارالحکومت اسٹاک ہوم میں فلسطینی پرچم تھامے سینکڑوں افراد کی جانب سے جنگ بندی کا مطالبہ کیا گیا۔