واشنگٹن: غزہ میں صیہونی حکومت کی وحشیانہ کارروائیوں کے نتیجے میں مجموعی طور پر شہید ہونے والے فلسطینیوں کی تعداد 18 ہزار سے زائد ہوچکی ہیں اور ایسے میں امریکی صدر جوبائیڈن نے صیہونی حکومت کی غیر متزلزل حمایت جاری رکھنے کا عزم کا اظہار کیا ہے۔
وائٹ ہاؤس میں جاری تقریب میں امریکی صدر نے کہا کہ حماس کو ختم کرنے تک صیہونی حکومت کی فوجی امداد جاری رکھیں گے۔
انہوں نے کہا کہ اس بات کا خیال رکھنا ہوگا کہ عالمی رائے عامہ ایک ہی رات میں بدل بھی سکتی ہے۔
اس دوران امریکی صدر نے صیہونی وزیراعظم نیتن یاہو سے اپنے مضبوط تعلق کا بھی اشارہ دیا۔
غزہ جنگ کا واحد حل عسکری حل ہے: ترجمان امریکی محکمہ خارجہ
دوسری جانب امریکی محکمہ خارجہ کے ترجمان میتھیو ملر نے کہا ہے کہ غزہ میں حماس کی قیادت کو زندہ چھوڑنے والی جنگ بندی ’ناقابل قبول‘ ہوگی، غزہ جنگ کا واحد حل عسکری حل ہے۔
انہوں نے کہا ہم سمجھتے ہیں کہ حماس کی قیادت کو ختم کرنے کا صرف فوجی حل ہوسکتا ہے جس نے 7 اکتوبر کے حملوں کی منصوبہ بندی کی تھی، بلآخر صیہونیوں اور فلسطینیوں کے درمیان وسیع تر تنازع کو فوجی طریقے سے حل نہیں کیا جا سکتا۔
شہادتیں 18 ہزار سے تجاوز کرگئیں
غزہ کی وزارت صحت نے صیہونی حکومت کی وحشیانہ کارروائیوں کے نتیجے میں مجموعی طور پر 18ہزار 200 سے زائد شہادتوں کی تصدیق کی ہے۔
وزارت صحت کے مطابق صیہونی حملوں کے نتیجے میں اب تک 49 ہزار سے زائد فلسطینی زخمی ہیں۔
وائٹ ہاؤس کے باہر مظاہرہ
ادھر وائٹ ہاؤس اور امریکی سینیٹ کی عمارت میں یہودی مظاہرین نے غزہ میں جنگ بندی کے لیے مظاہرہ کیا جس دوران متعدد مظاہرین کو گرفتار کرلیا گیا۔
علاوہ ازیں صیہونی حکومت نے حماس سے جنگ بندی کرانے کےلیے مصر اور قطر سے رابطہ کیا، صیہونی وزیر دفاع نے چند روز بعد یہ دعویٰ پھر دہرادیا کہ شمالی غزہ میں حماس بریکنگ پوائنٹ کے قریب ہے۔