غزہ کے معصوم بچے صیہونی حملوں میں زخمی ہونے کے بعد ایک دوسرے کو خود تسلی دینے لگے۔
فلسطینی مزاحمتی تنظیم حماس کے ساتھ عارضی جنگ بندی کا معاہدہ ختم ہونے کے بعد سے صیہونی کی غزہ اور دیگر قابض علاقوں پر بدترین بمباری جاری ہے۔
صیہونی حکومت کی جانب سے غزہ کے گنجان آباد جنوبی حصوں پر حملے کیے جا رہے ہیں جہاں شمالی غزہ سے جبری انخلا کے بعد فلسطینیوں کی اکثریت پناہ لیے ہوئے ہیں، صیہونی فورسز کی جانب سے رہائشی عمارتوں کو نشانہ بنایا جا رہا ہے۔
24 گھنٹوں کے دوران وحشیانہ صیہونی بمباری کے نتیجے میں 700 سے زائد فلسطینی شہید اور سینکڑوں زخمی ہوئے۔
صیہونی بمباری سے کہیں بچے والدین تو کہیں والدین بچوں سے بچھڑ گئے ، غزہ میں صیہونی بمباری کے بعد ملبے سے نکالے گئے زخمی بھائی بہن کی ویڈیو بھی منظرِ عام پر آگئی۔
ویڈیو میں زخمی بہن بار بار اپنے زخمی بھائی سے اپنے خاندان کی خیریت کے بارے میں پوچھ رہی ہے ، بھائی کے پاس زخمی بہن کے سوالوں کا کوئی جواب نہیں۔
دوسری جانب عالمی ادارہ صحت کے سربراہ ٹیڈروس ایڈہانوم نے غزہ کے اسپتالوں کی صورتحال کو ‘ناقابل تصور’ قرار دیتے ہوئے کہا کہ جنوبی غزہ میں نصراسپتال کے حالات ناقص سے بھی بدتر ہیں، اسپتال میں گنجائش سے تین گنا زائد مریض موجود ہیں، مریضوں کا علاج زمین پر کیا جارہا ہے اور مریض درد سے چیخ رہے ہیں۔
واضح رہے کہ غزہ کے سرکاری اہلکار کے مطابق صیہونی بمباری سے غزہ پٹی میں اب تک 15 لاکھ سے زائد افراد بےگھر ہو چکے ہیں جبکہ عرب میڈیا رپورٹس کے مطابق 7 اکتوبر سے اب تک شہید فلسطینیوں کی تعداد 16 ہزار سے تجاوز کر چکی ہے۔