امریکا کے صدر ڈونلڈ ٹرمپ کا کہنا ہے کینیڈا کے شہریوں کی بڑی تعداد امریکا کی 51 ویں ریاست کا حصہ بننا چاہتی ہے۔
وائٹ ہاؤس میں صحافیوں کے سوالوں کا جواب دیتے ہوئے امریکا کے صدر ڈونلڈ ٹرمپ نے ایک بار پھرکینیڈا کو امریکا کی 51 ویں ریاست بنانے کی خواہش کا اظہار کیا۔
کینیڈا میں امریکی ریاست کا حصہ بننے سے متعلق سوال پر ڈونلڈ ٹرمپ کا کہنا تھا یہ بات درست ہے کہ کینیڈا کے شہریوں کی بڑی تعداد امریکا کی 51 ویں ریاست کا حصہ بننا چاہتی ہے۔
ڈونلڈ ٹرمپ کا کہنا تھا کینیڈین شہریوں کو بہت زیادہ ٹیکسز ادا کرنا پڑتے ہیں لیکن انہیں سکیورٹی کے لیے بہت زیادہ ٹیکس ادا نہیں کرنا پڑتا کیونکہ وہ ہم پر انحصار کرتے ہیں جو کہ ہمارے ساتھ بہت ناانصافی ہے۔
امریکی صدر کا کہنا تھا کینیڈا کاریں تیار کرتا ہے جو ہم بھی تیار کر سکتے ہیں اور پھر انہیں امریکا بھیجتا ہے، کینیڈا امریکا سمیت اور بھی بہت سی چیزیں امریکا بھیجتا ہے، امریکا کو لمبر (عمارتوں کی تیاری میں استعمال ہونے والی لکڑی) کی کوئی ضرورت نہیں ہے۔
امریکی صدر کے اس بیان پر کینیڈا میں ایک نئی بحث چھڑ گئی ہے اور کینیڈین میڈیا نے ڈونلڈ ٹرمپ کے بیان کی سختی سے تردید کرتے ہوئے کہا ہے کہ حال ہی میں کیے گئے سروے کے مطابق کینیڈا کے 10 میں سے 7 افراد امریکی شہری بننے کے مخالف ہیں۔
اس حوالے سے کینیڈین وزیراعظم جسٹن ٹروڈو واضح الفاظ میں کہہ چکے ہیں کہ کینیڈا قیامت تک امریکا میں ضم نہیں ہو گا۔ کینیڈین وزیراعظم نے امریکی ٹیرف کے جواب میں امریکی درآمدات پر 25 فیصد جوابی ٹیرف کا اعلان بھی کیا تھا۔