اسلام آباد (شوریٰ نیوز) وزیر خارجہ کا اسلاموفوبیا کے خلاف اقوام متحدہ کی اجتماعی کارروائی پر زور،بلاول بھٹو زرداری کی اقوام متحدہ کے سیکرٹری جنرل سے توہین قرآن مجید واقعات پر گفتگو، وزیر خارجہ بلاول بھٹو زرداری نے اقوام متحدہ کے سیکرٹری جنرل انتونیو گوتریس سے ٹیلیفونک رابطہ کیا جس میں قرآن مجید کے نسخوں کی توہین کے واقعات سمیت دیگر امور پر تبادلہ خیال کیا گیا۔ترجمان دفتر خارجہ کے مطابق بلاول بھٹو زرداری نے اسلاموفوبیا کے خلاف اقوام متحدہ کی اجتماعی کارروائی کی ضرورت پر زور دیا۔ وزیر خارجہ اور سیکرٹری جنرل اقوام متحدہ کے درمیان سیلاب کے بعد بحالی کی صورت حال پر بھی بات چیت کی۔ وزیر خارجہ نے انتونیو گوتریس سے ترقی پذیر ممالک میں تحفظ خوراک پر بھی بات کی جب کہ اس دوران بحرِ اسود میں خوراک کے اقدام کے حوالے سے بھی گفتگو کی ہوئی۔وزیر خارجہ بلاول بھٹو زرداری نے قرآن پاک کی بے حرمتی کے معاملے پر او آئی سی کے جنرل سیکرٹری سے ٹیلی فونک رابطہ کیا۔ وزیر خارجہ بلاول بھٹو زرداری نے او آئی سی کے جنرل سیکرٹری حسین ابراہیم طحہٰ سے آج ٹیلی فونک رابطہ کیا جو یورپی ممالک میں قرآن پاک کی بے حرمتی کے مسلسل واقعات کے تناظر میں کیا گیا۔