پیلو بلباؤنے ٹور ڈی فرانس سائیکل ریس کا دسواں مرحلہ اپنے نام کرلیا

پیرس(شوریٰ نیوز) پیلو بلباؤنے ٹور ڈی فرانس سائیکل ریس کا دسواں مرحلہ اپنے نام کرلیا،سپین سے ٹورڈی فرانس سائیکل ریس کے 110 واں ایڈیشن جاری ہے، سپین کے سائیکل سوار پیلو بلباؤنے ٹور ڈی فرانس سائیکل ریس کا دسواں مرحلہ جیت لیا۔ ریس میں ہسپانوی سائیکل سوار پیلو بلباؤ کی یہ پہلی فتح ہے۔ سپین سے ٹورڈی فرانس سائیکل ریس کے 110 واں ایڈیشن جاری ہے ، جس میں دنیا بھر کی سائیکلنگ کی 22ٹیموں کے نامور سائیکل سوار ٹائٹل کے حصول کے لئے کوشاں ہیں۔ٹور ڈی فرانس سائیکل ریس کے دسویں مرحلے میں سائیکل سواروں نے فرانس میں ولکینیا سے ایسوا تک کا 167.5 کلو میٹر فاصلہ طے کرنا تھاجو درمیانی پہاڑی راستے پر محیط تھا۔33 سالہ ہسپانوی سائیکلسٹ پیلو بلبائو نے عمدہ سائیکلنگ کا مظاہرہ کرتے ہوئے جرمن سائیکلسٹ جارج زیمرمین کو شکست دیتے ہوئے پہلی پوزیشن حاصل کی۔پیلو بلبائو نے دسویں مرحلے کا 167.5 کلومیٹر پر مشتمل مطلوبہ فاصلہ 3 گھنٹے 52منٹ اور 34 سیکنڈز میں طے کرکے اپنے نام کیا۔ جرمن سائیکلسٹ جارج زیمرمین نے دوسری جبکہ آسٹریلوی سائیکلسٹ بین او کونر نے تیسری پوزیشن حاصل کی۔چھٹے مرحلے سے ڈینش سائیکلسٹ جوناس ونجیگارڈ کا یلو جرسی پر قبضہ برقرار ہے۔ٹور ڈی فرانس سائیکل ریس 21 مرحلوں پر محیط ہوگی جس میں سائیکل سوار 3406کلو میٹر کا سفر طے کریں گے ۔ 24 روزہ ٹور ڈی فرانس سائیکل ریس23 جولائی کو اختتام پذیر ہوگی،جس میں ٹیم جمبو ویزما کے ڈینش سائیکل سوار جوناس ونجیگارڈ راسموسن اپنے اعزاز کا دفاع کے لئے کوشاں ہیں ۔ٹور ڈی فرانس سائیکل ریس کا پہلا ایڈیشن1903میں ہوا ،جو فرانسیسی سائیکل سوار مورس فرانسس گارین نے جیتا تھا۔