پہلی سپیریئر قومی مرد و خواتین کی تیز ترین ریس کے مقابلے آئندہ ماہ 8 اکتوبر کو لاہور میں منعقد ہوں گے
ایتھلیٹکس فیڈریشن آف پاکستان کے زیر اہتمام اور سپیریئر یونیورسٹی لاہور کے تعاون سے پہلی سپیریئر قومی مرد و خواتین کھلاڑیوں کی تیز ترین ریس کے مقابلے آئندہ ماہ 8 اکتوبر کو پنجاب سٹیڈیم لاہور میں منعقد ہوں گے۔ ان خیالات کا اظہار گزشتہ روز ایتھلیٹکس فیڈریشن آف پاکستان کے صدر بریگیڈیئر وجاہت حسین (ریٹائرڈ) نے کیا۔ انہوں نےکہاکہ میگا ایونٹ کی تیاریاں ابھی سے شروع کردی گئی ہیں اورمیگا ایونٹ میں ملک بھر سے تمام مرد اور خواتین کھلاڑی حصہ لیں گے۔
اس سلسلہ میں فیڈریشن کے ساتھ تمام منسلک محکموں، صوبائی اور علاقائی ایسوسی ایشنز کو دعوت نامے جاری کر دیئے گئے ہیں کیا۔ بریگیڈیئر وجاہت حسین نے کہا کہ فاتح مردوں اور خواتین کھلاڑیوں کو نقد انعامات دیئے جائیں گے جن میں پہلا انعام 1 لاکھ روپے، دوسرا انعام 50 ہزار روپے، تیسرا انعام 25 ہزار روپے اور 4 سے 8 پوزیشن ہولڈرز کے لئے دس، دس ہزار روپے کا انعام رکھا گیا ہے ۔
ایونٹ میں شرکت کی دلچسپی رکھنے والے کھلاڑی ای میل کے ذریعے pak@mf.worldathletics.org اپنے، اپنے ناموں کی رجسٹریشن 5 اکتوبر تک کروا سکتے ہیں۔ انہوں نےکہاکہ تمام کھلاڑی 8 اکتوبر 2024 کو صبح 9 بجے پنجاب سٹیڈیم، لاہور میں نیشنل کوچنگ ایسوسی ایشن کے صدر رفیق احمد اور ایتھلیٹکس فیڈریشن آف پاکستان کے ہیڈ کوچ چوہدری اصغر علی گل کو رجسٹریشن اور دستاویزات کی اسکروٹنی کے لئے رپورٹ کریں گے۔