مینز کیریبین پریمیئر لیگ کا بارہواں ایڈیشن کل (جمعہ سے) ویسٹ انڈیز میں شروع ہوگا۔ایم سی پی ایل میں دنیائے کرکٹ کے مختلف ممالک کے نامور کھلاڑی ایکشن میں نظر آئیں گے۔گیانا ایمیزون واریئرز کی ٹیم نے گزشتہ سال فائنل میچ میں ٹرنباگو نائٹ رائیڈرز کو9وکٹوں سے شکست دیکر لیگ کا چیمپئن ہونے کا اعزاز حاصل کیا تھا اس لئے گیانا ایمیزون واریئرز کی ٹیم ٹائٹل کا دفاع کرے گی۔
لیگ میں 6 ٹیمیں ٹائٹل کے حصول کے لئے پنجہ آزمائی کریں گی جن میں دفاعی چیمپئن گیانا ایمیزون واریئرز ،اینٹیگوا اینڈ باربوڈا فالکنز ،سینٹ کٹس اینڈ نیوس پیٹریاٹس، بارباڈوس رائلز ،گیانا ایمیزون واریئرز ، سینٹ لوشیا کنگز اورٹرنباگو نائٹ رائیڈرزشامل ہیں۔
جمیکا تلاوہ کی جگہ اینٹیگوا اور باربوڈا فالکنز نے لے لی ہے۔لیگ میں فائنل سمیت 34میچز کھیلے جائیں گے۔ سی پی ایل کا ابتدائی میچ اینٹیگوا اینڈ باربوڈا فالکنز اور سینٹ کٹس اینڈ نیوس پیٹریاٹس کی ٹیموں کے درمیان سر ویوین رچرڈز سٹیڈیم، انٹیگوا میں کھیلا جائے گا۔
مینزکیریبین پریمیئر لیگ کا آغاز 2013میں ہوا تھا۔مینز کیریبین پریمیئر لیگ کی تاریخ میں اب تک 11 ایڈیشن کھیلے جاچکے ہیں جن میں ٹرنباگو نائٹ رائیڈرز کی ٹیم سب سے زیادہ چار مرتبہ ٹائٹل جیت چکی ہے، جمیکا تلاوا تین ،بارباڈوس کی ٹیم دو جبکہ گیانا ایمیزون واریئرز اور سینٹ کٹس اینڈ نیوس پیٹریاٹس کی ٹیم ایک،ایک مرتبہ یہ ٹائٹل اپنے نام کر چکی ہیں ۔