پاکستان کبڈی فیڈریشن کے زیر اہتمام جاری قومی کبڈی چیمپئن شپ کے مزید چھ میچ (کل)جمعرات کو جناح سٹیڈیم، اسلام آباد میں کھیلے جائیں گے۔
پہلا میچ پاکستان پولیس اور اسلام آباد کے درمیان ، دوسرے میچ میں ہائر ایجوکیشن کمیشن اور گلگت بلتستان کی ٹیمیں آمنے سامنے ہوں گی،تیسرا میچ پاکستان آرمی کا مقابلہ پنجاب کی ٹیموں کے دریان کھیلاجائے گا۔
چوتھا میچ پاکستان واپڈا اور بلوچستان کی ٹیموں کے درمیان کھیلا جائے گا، پانچویں میچ میں پاکستان پولیس اور ہائر ایجوکیشن کمیشن کی ٹیمیں پنجہ آزمائی کریں گی اور چھٹا میچ اسلام آباد اور گلگت بلتستان کی ٹیموں کے درمیان کھیلا جائے گا۔
پاکستان کبڈی فیڈریشن کے سیکرٹری جنرل محمد سرور رانا نے بتایا کہ چیمپئن شپ میں ملک بھر سے فیڈریشن کے ساتھ منسلک 12 ڈیپارٹمنٹ، صوبائی اور ریجنل ایسوسی ایشنز کی ٹیمیں حصہ لے رہی ہیں۔
جن میں پاکستان آرمی، پاکستان ائیر فورس، پاکستان واپڈا، پاکستان پولیس، پی او ایف واہ، ہائر ایجوکیشن کمیشن، پنجاب، خیبرپختونخوا، سندھ، بلوچستان، گلگت بلتستان اور اسلام آباد کی ٹیمیں شامل ہیں۔
ان ٹیموں کو چار گروپوں میں تقسیم کیا گیا ہے۔چیمپئن شپ 3 مارچ تک جاری رہے گی اور چیمپئن شپ کے اختتام پر کامیابی حاصل کرنے والے کھلاڑیوں میں انعامات تقسیم کئے جائیں گے۔