پاکستان کرکٹ ٹیم کے عبوری ہیڈکوچ عاقب جاوید کی جگہ نیوزی لینڈ ٹیم کےسابق ہیڈ کوچ مائیک ہیسن ہیڈ کوچ بننے کے لیے مضبوط اُمیدوار ہیں۔
مائیک ہیسن اس وقت پاکستان سپر لیگ کی ٹیم اسلام آباد یونائیٹڈ کے بھی ہیڈکوچ ہیں اور پاکستان کرکٹ بورڈ نے مائیک ہیسن سے رابطہ کیا ہے۔
گزشتہ سال بھی پی سی بی نے ان سے رابطہ کیا تھا لیکن انہوں نے پہلے سے طے شدہ مصروفیات کی وجہ سے معذرت کر لی تھی۔
ذرائع کا کہنا ہےکہ مائیک ہیسن کے پی سی بی حکام سے مذاکرات چل رہے ہیں جب کہ سابق ہیڈ کوچ ثقلین مشتاق بھی اس دوڑ میں تھے لیکن مائیک ہیسن بظاہر مضبوط اُمیدوار دکھائی دے رہے ہیں۔
ذرائع کے مطابق پی سی بی ایک بار پھر غیر ملکی ہیڈ کوچ کی طرف جارہا ہے۔ ہیڈ کوچ کے لیے لیول تھری کی اہلیت درکار ہے اور 4 مئی تک درخواستیں طلب کی گئی ہیں۔
ہیڈ کوچ کے لیے پی سی بی کے پاس محدود چوائس ہیں اور غیر ملکی کوچ کی طرف پی سی بی کا رحجان زیادہ ہے۔
جولائی 2012 میں انہیں جان رائٹ کی جگہ نیوزی لینڈ کا ہیڈ کوچ مقرر کیا گیا تھا، مائیک ہیسن آئی پی ایل میں بھی کوچنگ کرچکے ہیں۔