پاکستان ویمنز کرکٹ ٹیم چھٹی مرتبہ آئی سی سی ورلڈ کپ میں شرکت کرے گی۔
آئی سی سی ویمنز ورلڈکپ کوالیفائر میں میزبان پاکستان، ویسٹ انڈیز، بنگلا دیش، تھائی لینڈ، اسکاٹ لینڈ اور آئرلینڈ کی ٹیموں نے حصہ لیا۔
سنگل لیگ کی بنیاد پر منعقدہ ٹورنامنٹ 9 سے 19 اپریل 2025 تک لاہور میں ہوا۔
فاسٹ بولر فاطمہ ثنا کی قیادت میں پاکستان ٹیم نے اپنے تمام میچ جیتے، جب کہ بنگلا دیش اور ویسٹ انڈیز کی ٹیموں نے 3,3 میچوں میں کامیابی حاصل کی۔
البتہ بہتر "رن اوسط” کی بنیاد پر بنگلا دیش کی ٹیم نے دوسری مرتبہ ورلڈکپ کھیلنےکا اعزاز حاصل کرلیا۔
دفاعی چیمپئن آسٹریلیا، جنوبی افریقا، نیوزی لینڈ، سری لنکا، انگلینڈ، نیوزی لینڈ، پاکستان اور میزبان بھارت کی ٹیمیں 29 ستمبر سے 26 اکتوبر 2025 تک کھیلے جانے والے ایونٹ میں کھیلنے کی اہل ہونگی۔
گزشتہ دنوں پاکستان کرکٹ بورڈ کے سربراہ سید محسن رضا نقوی نے پاکستان خواتین کرکٹ ٹیم کی کھلاڑیوں اور منیجمنٹ سے ملاقات کی اور انہیں ورلڈکپ کوالیفائر میں شاندار پرفارمنس پر مبارک باد پیش کی۔
چیئرمین پی سی سید محسن رضا نقوی نے ملاقات کے دوران خواتین کھلاڑیوں سے مین راؤنڈ میں اچھی پرفارمنس کی امید بھی ظاہر کی، ساتھ ہی چیئرمین پی سی بی نے دو ٹوک مؤقف اپنایا کہ معاہدے کے مطابق پاکستان خواتین کرکٹ ٹیم بھارت میں کھیلے جانے والے آئی سی سی ورلڈکپ کے لیے بھارت نہیں جائیگی۔
آئی سی سی خواتین کرکٹ ورلڈکپ کا پہلا ایڈیشن 1975 میں انگلینڈ میں منعقد ہوا تھا، اس مرتبہ آئی سی سی خواتین ورلڈکپ کا 13 واں ایڈیشن بھارت میں منعقد ہوگا۔
پاکستان خواتین کرکٹ ٹیم نے چھٹی بار آئی سی سی خواتین ورلڈکپ کھیلنے کے لیے کوالیفائی کیا ہے۔ پہلی بار پاکستان ٹیم نے 1997 میں بھارت میں کھیلے جانیوالے ورلڈکپ میں شرکت کی اور گیارہ ٹیموں میں آخری پوزیشن حاصل کی۔
2009 میں آسڑیلیا ورلڈکپ میں پاکستان ٹیم پانچویں نمبر پر رہی۔ 2013 ,2017 اور 2022 آئی سی سی خواتین ورلڈ کپ میں پاکستان خواتین کرکٹ ٹیم آٹھ ٹیموں کے ٹورنامنٹ میں آٹھویں اور آخری نمبر پر رہی ۔