پاکستان سپر لیگ (پی ایس ایل ) 10 کی ٹیم کراچی کنگز میں شامل حسن علی کا کہنا ہے وہ ٹورنامنٹ کا بہترین بولر بننا چاہتے ہیں لیکن اہم بات کنگز کو جتوانا ہے۔
میڈیا کو دیے گئے انٹرویو میں حسن علی نے بتایا کہ وکٹیں مل رہی ہیں، اپنی ذاتی کارکردگی سے کافی مطمئن ہوں، این سی اے میں کافی محنت کی، پہلے نیشنل ٹی ٹوئنٹی اور اب پی ایس ایل میں مجھے محنت کا صلہ ملا۔
حسن علی نے اپنی ڈائٹ پر بات کرتے ہوئے بتایا کہ میں نے بولنگ میں کمی کو درست کیا، کچھ چیزوں کو ری موڈیفائی کیا، اپنی فٹنس، ڈائٹ اور انجری پر بھی کام کیا لیکن روٹی گینگ ختم نہیں کیا اور نہ ہوگا، ڈائٹ بہتر کرنے کے بعد اب میں کافی تروتوانا محسوس کررہا ہوں، دیر آئے درست آئے، اس بارے میں اہلیہ نے بھی مجھے کافی مدد کی، ہم ہمیشہ پراٹھے کھا کر بڑے ہوئے، ایتھلیٹس کیلئے ڈائٹ کا کردار کافی اہم ہوتا ہے جب کہ باہر کے ایتھلیٹ کی غذا اچھی ہوتی ہے۔
حسن علی کا کہنا تھا کہ پاکستان سپر لیگ میں میرا سفر کافی خوبصورت رہا ہے، ایک ایمجرنگ پلیئر کے طور پر پک ہونا، پھر فائنل جیتنا، یہ سب بہت یادگار ہے، اس لیگ نے پاکستان کے بہت سارے ٹیلنٹ کو گروم کیا ہے، میں ڈومیسٹک کھیل چکا تھا لیکن پی ایس ایل کے بعد میرے لیے انٹرنیشنل کھیلنا آسان تھا، مجھے پی ایس ایل میں دنیا کے ٹاپ پلیئرز کے ساتھ کھیلنے کا موقع ملا۔
انہوں نے مزید کہا کہ میرا کام پرفارمنس دینا ہے اور میری خواہش یہ ہے کہ دوبارہ پاکستان کیلئے کھیلوں، میں ابھی30 سال کا ہوں، ابھی بہت کرکٹ باقی ہے، میں پرفارمنس کے ساتھ ٹیم میں رہنا چاہتا ہوں اور پرفارمنس ہوگی تو ٹیم میں رہوں گا۔
حسن علی نے کہا کہ میرے لیے ذاتی اہداف سے اہم ٹیم کو جتوانا ہے، ٹورنامنٹ کا بہترین بولر بننا چاہتا ہوں لیکن اہم بات کنگز کو جتوانا ہے، جب آپ بیسٹ بولر بنتے ہیں تو سب کی توجہ آپ پر ہوتی ہیں، وارنر کی کپتانی میں بہت کچھ سیکھنے کو ملتا ہے اگر کسی نے مستقبل میں سمجھا کہ میں کپتانی کرسکتا ہوں تو بخوشی اس ذمہ داری کو قبول کروں گا۔