قومی ٹی ٹوئنٹی کپ کے فائنل میچ میں شاندار کارکردگی کا مظاہرہ کرتے ہوئے لاہور بلوز نے ٹائٹل اپنے نام کرلیا۔
اطلاعات کے مطابق حسین طلعت کی زیر قیادت لاہور بلوز نے قومی ٹی ٹوئنٹی کپ جیت لیا۔ گزشتہ روز اقبال اسٹیڈیم فیصل آباد میں کھیلے گئے فائنل میں ٹیم نے پشاور کو 9 وکٹ سے شکست دے دی۔
تفصیلات کے مطابق ٹاس جیت کر پہلے بیٹنگ کرتے ہوئے پشاور نے 9 وکٹ پر 110 رنز اسکور کیے۔ ٹیم کی امیدیں ایونٹ میں تین سنچریاں بنانے والے صاحبزادہ فرحان سے وابستہ تھیں، وہ ایک چوکے اور ایک چھکے کی مدد سے 17 رنز بناکر آؤٹ ہوگئے جس کے نتیجے میں پشاور کی ٹیم بڑا اسکور بنانے سے قاصر رہی۔
کپتان افتخار احمد 2 چوکوں کی مدد سے 34 رنز بناکر ٹاپ اسکورر رہے۔ وکٹ کیپر ذوالکفل نے 32 رنز کی اننگز کھیلی جبکہ محمد سلمان مرزا نے صرف 21 رنز دے کر 4 وکٹیں حاصل کیں۔ محمد عرفان نے 2 کھلاڑیوں کو آؤٹ کیا۔
لاہور بلوز نے جیت کےلیے درکار 111 رنز کا ہدف 16 اوورز میں حاصل کرلیا۔ عمر صدیق نے 6 چوکوں اور 2 چھکوں کی مدد سے ناقابل شکست 64 رنز بنائے۔ جنید علی 30 رنز بناکر ناٹ آؤٹ رہے۔
فائنل میں پلیئر آف دی میچ ایوارڈ محمد سلمان مرزا نے حاصل کیا۔ جبکہ 121 کی اوسط سے 605 رنز بنانے والے صاحبزادہ فرحان بہترین بیٹر اور پلیئر آف دی ٹورنامنٹ قرار پائے۔ سیالکوٹ کے حسن علی 13 وکٹوں کے ساتھ بہترین بولر بنے۔ اور لاہور وائٹس کے محمد اخلاق بیسٹ وکٹ کیپر قرار پائے، انھوں نے 114 رنز اسکور کرنے کے ساتھ 4 کیچز اور 2 اسٹمپڈ کیے۔
قبل ازیں بدھ کی شب دوسرے سیمی فائنل میں لاہور بلوز نے ملتان کو 5 رنز سے زیر کیا تھا۔