آئی سی سی چیمپئنز ٹرافی کے گروپ اے کے آخری میچ میں بھارتی بیٹر ویرات کوہلی کا شاندار کیچ کرنے پر کوہلی کے فینز نے سوشل میڈیا پر کیوی فیلڈر گلین فلپس کی جگہ غلط’PHILIPS’ کو تنقید کا نشانہ بنا ڈالا۔
اتوار کو بھارتی کرکٹ ٹیم آئی سی سی چیمپئنز ٹرافی میں گروپ اے کے آخری میچ میں نیوزی لینڈ کے خلاف مدمقابل تھی۔ یہ میچ دبئی میں کھیلا گیا۔
چیمپئنز ٹرافی میں نیوزی لینڈ کے خلاف میچ ویرات کوہلی کے ون ڈے کیریئر کا 300 واں میچ تھا۔اس میچ میں کوہلی کیوی فیلڈر گلین فلپس کے شاندار کیچ کی بدولت 11 رنز بنا کر آؤٹ ہوگئے۔
نیوزی لینڈ کے گلین فلپس نے کوہلی کا پوائنٹ پوزیشن پر شاندار کیچ لیا جس پر کوہلی بھی حیران نظر آئے۔ شوہر کے آؤٹ ہونے پر گراؤنڈ میں موجود انوشکا شرما نے بھی سرپر ہاتھ رکھ کر حیرانی کا اظہار کیا۔
گلین فلپس کے شاندار کیچ کی ویڈیو سوشل میڈیا پر بھی وائرل ہوئی۔
فلپس کے بہترین کیچ کے بعد سوشل میڈیا پلیٹ فارمز، خصوصاً انسٹاگرام پرکوہلی کے ناراض مداحوں نے اپنی مایوسی کا اظہار کیا اور غلط فلپس کو تنقید نشانہ بنا ڈالا۔
بھارتی میڈیا کے مطابق کوہلی کے فینز نے گلین فلپس کے بجائے الیکٹرونک برانڈ”PHILIPS”کے انسٹاگرام اکاؤنٹ پر کمنٹ کیے، جس سے ایک دلچسپ صورتحال پیدا ہو گئی۔
ایک صارف نے الیکٹرونک برانڈ ‘philipsindia’ کی پوسٹ کے نیچے کمنٹ میں لکھا کہ کوہلی کو آؤٹ کو کیوں کیا؟
تاہم دوسرے صارف نے کمنٹ کرنے والے کوہلی فین کو درست کیا کہ یہ وہ فلپس کا اکاؤنٹ نہیں جس نے کوہلی کا کیچ کیا۔
کوہلی کے متعدد فینز نے الیکٹرونک برانڈ کے انسٹاگرام اکاؤنٹ کو گلین فلپس کا اکاؤنٹ سمجھ کر کمنٹ کرتے ہوئے کیچ کرنے پر ناراضی کا اظہار کیا۔
واضح رہے کہ چیمپئنز ٹرافی میں گروپ اسٹیج کے آخری میچ میں بھارت نے نیوزی لینڈ کو 44 رنز سے شکست دی۔
بھارتی ٹیم نے پہلے بیٹنگ کرتے ہوئے مقررہ 50 اوورز میں 9 وکٹوں کے نقصان پر 249 رنز اسکور کیے۔250 رنز کے ہدف کے جواب میں نیوزی لینڈ کی ٹیم 46 ویں اوور میں205 رنز بنا کر آؤٹ ہوگئی۔