جنوبی افریقا کیخلاف کرکٹ سیریز کیلئےپاکستان ویمن ٹیم کا اعلان

لاہور (شوریٰ نیوز)جنوبی افریقا کیخلاف کرکٹ سیریز کیلئےپاکستان ویمن ٹیم کا اعلان، تین ٹی20 انٹرنیشنل میچز یکم سے 5 ستمبر، ون ڈے سیریز 8 سے 14 ستمبر تک ہو گی، پاکستان کی خواتین کرکٹ ٹیم کے چیف سلیکٹر سلیم جعفر نے 15 رکنی اسکواڈ کا اعلان کر دیا ہے جو آئندہ ماہ جنوبی افریقا کے خلاف وائٹ بال سیریز میں حصہ لے گا۔جنوبی افریقا کی خواتین کرکٹ ٹیم پہلی مرتبہ پاکستان کے دورے پر آرہی ہے اور اس کےخلاف سیریز کے تمام میچز یکم سے 14 ستمبر تک نیشنل بینک اسٹیڈیم کراچی میں کھیلے جائیں گے۔جنوبی افریقا کے خلاف اس دو طرفہ سیریز میں تین ٹی20 انٹرنیشنل اور تین ون ڈے انٹرنیشنل ہوں گے۔ ون ڈے میچز آئی سی سی ویمنز چیمپیئن شپ 2023-25 کا حصہ ہوں گے۔ تین ٹی20 انٹرنیشنل میچز یکم سے 5 ستمبر تک ہوں گے جبکہ ون ڈے سیریز 8 سے 14 ستمبر تک کھیلی جائے گی۔اٹھارہ سالہ شوال ذوالفقار کو ٹی20 اسکواڈ میں شامل کیا گیا ہے۔ وہ آئندہ ماہ ہونے والے ایشین گیمز کے لیے پہلے ہی سلیکٹ ہوچکی ہیں۔دائیں ہاتھ کی فاسٹ بولر ڈیانا بیگ کی ٹیم میں چھ ماہ کے بعد واپسی ہوئی ہے۔ لیگ اسپنر سیدہ عروب شاہ کی تین سال بعد ٹی20 ٹیم میں واپسی ہوئی ہے۔ اسی طرح آل راؤنڈر نتالیہ پرویز کی 2018 کے بعد ٹی20 اسکواڈ میں واپسی ہوئی ہے۔ وکٹ کیپر نجیہہ علوی بھی 15 رکنی ٹی20 اسکواڈ کا حصہ ہیں۔ایمن امین، جویریہ خان، عائشہ نسیم (انٹرنیشنل کرکٹ سے ریٹائرڈ)، سدرہ نواز اور طوبیٰ حسن جو ٹی20 ورلڈ کپ میں کھیلی تھیں اب ٹیم کا حصہ نہیں ہیں۔عمیمہ سہیل کو ٹی 20 سیریز کے لیے ریزرو میں رکھا گیا ہے ۔ ام ہانی اور وحیدہ اختر کا سلیکشن عائشہ نسیم اور کائنات امتیاز کی جگہ عمل میں آیا ہے ،پاکستانی ٹیم کی قیادت تجربہ کار آل راؤنڈر ندا ڈار کریں گی پاکستانی خواتین کرکٹ ٹیم کا انتخاب چیف سلیکٹر سلیم جعفر کی سربراہی میں قائم سلیکشن کمیٹی اور کپتان ندا ڈار کے باہمی صلاح مشورے کے بعد عمل میں آیا ہے۔چیف سلیکٹر سلیم جعفر کا کہنا ہے کہ کافی غور و خوص کے بعد ہم نے فیصلہ کیا کہ سیدہ عروب شاہ اور نتالیہ پرویز کو ٹی 20 فارمیٹ میں واپس لایا جائے ۔