آئی سی سی چیمپئنز ٹرافی 2025 کے قریب آتے ہی نظر ڈالتے ہیں ان پانچ بلے بازوں پر جو اپنی شان دار بیٹنگ سے ٹورنامنٹ کو یادگار بنا سکتے ہیں۔
آئی سی سی کا کہنا ہے کہ چیمپئنز ٹرافی 2025 میں یہ پانچ بلے باز اپنی شاندار بیٹنگ سے سب کی توجہ کا مرکز بن سکتے ہیں۔
فخر زمان (پاکستان)
میچز: 85، رنز: 3627، اوسط: 46.50، بہترین اسکور: 210*، سنچریاں: 11، نصف سنچریاں: 17
پاکستان کے بہترین ون ڈے اوپنرز میں شمار ہونے والے فخر زمان اپنی دھواں دار بیٹنگ سے کسی بھی لمحے میچ کا رخ بدل سکتے ہیں۔ 2017 کے چیمپئنز ٹرافی فائنل میں بھارت کے خلاف انکی 114 رنز کی اننگز آج بھی یادگار ہے۔ حالیہ ٹرائی نیشن سیریز میں واپسی کرنے والے فخر ایک بار پھر پاکستان کی امیدوں کا مرکز ہوں گے۔
ڈیرل مچل (نیوزی لینڈ)
میچز: 45، رنز: 1765، اوسط: 50.42، بہترین اسکور: 134، سنچریاں: 6، نصف سنچریاں: 7
نیوزی لینڈ کے مڈل آرڈر بیٹر ڈیرل مچل ایشیائی کنڈیشنز میں اپنی شاندار کارکردگی کے لیے مشہور ہیں۔ انہوں نے ورلڈ کپ 2023 میں 552 رنز بنائے اور حالیہ ٹرائی نیشن سیریز میں پاکستان کے خلاف دو نصف سنچریاں اسکور کیں۔ مچل، کین ولیمسن کے ساتھ مل کر نیوزی لینڈ کی بیٹنگ کا اہم ستون ہوں گے۔
ہینرک کلاسن (جنوبی افریقا)
میچز: 58، رنز: 2074، اوسط: 44.12، بہترین اسکور: 174، سنچریاں: 4، نصف سنچریاں: 10
جنوبی افریقہ کے پاور ہٹر ہینرک کلاسین اپنی برق رفتار بیٹنگ سے مخالفین کے لیے خوف کی علامت بنے ہوئے ہیں۔ وہ تیز ترین اسٹرائیک ریٹ رکھنے والے بیٹرز میں سے ایک ہیں اور اسپنرز کو بہترین انداز میں کھیلنے کی مہارت رکھتے ہیں۔
شریاس ایر (بھارت)
میچز: 65، رنز: 2602، اوسط: 48.18، بہترین اسکور: 128، سنچریاں: 5، نصف سنچریاں: 20
بھارتی مڈل آرڈر بیٹسمین شریاس ائیر نے انگلینڈ کے خلاف حالیہ سیریز میں شاندار کارکردگی دکھائی۔ روہت شرما اور ویرات کوہلی کی حالیہ ناقص پرفارمنس کے دوران ان کی موجودگی بھارتی بیٹنگ لائن کیلئے اہم ہوگی۔
بین ڈکٹ (انگلینڈ)
میچز: 19، رنز: 831، اوسط: 46.16، بہترین اسکور: 107، سنچریاں: 2، نصف سنچریاں: 6
انگلینڈ کے اوپنر بین ڈکٹ اپنی جارحانہ بیٹنگ کے لیے جانے جاتے ہیں۔ وہ فل سالٹ کے ساتھ خطرناک اوپننگ جوڑی بناتے ہیں۔ چیمپئنز ٹرافی میں انگلینڈ کی کامیابی کے لیے بین ڈکٹ کا لمبی اننگز کھیلنا کلیدی ہوگا۔