پاکستان کے شایان آفریدی نے آئی ٹی ایف ایشیا 14 اور انڈر ڈیولپمنٹ چیمپئن شپ 2025 جیت لی۔
پاکستان کے شایان آفریدی نے کولمبو، سری لنکا میں منعقدہ آئی ٹی ایف ایشیا 14 اور انڈر ڈیولپمنٹ چیمپئن شپ 2025 ویک-1 ریجنل کوالیفائنگ ایونٹ برائے ساؤتھ ایسٹ اینڈ ایسٹ ایشیا میں فتح حاصل کی۔
فائنل میں شایان نے ٹورنامنٹ کے سیکنڈ سیڈ، سنگاپور کے پاک نکولس منگ این کو 6-3، 6-7(3) 6-4 کے اسکور کے ساتھ شکست دے کر ویک-1 کے لیے چیمپئن شپ کا ٹائٹل اپنے نام کیا۔
پاکستان اسپورٹس بورڈ کے ڈائریکٹر جنرل جناب محمد یاسر پیرزادہ نے شایان کو اس کی غیر معمولی کارکردگی پر مبارکباد دیتے ہوئے کہا کہ ‘شایان کی جیت پاکستان میں کھیلوں کے روشن مستقبل کا منہ بولتا ثبوت ہے’۔
انہوں نے اسپورٹس بورڈ کے ملک کے کھلاڑیوں کی حمایت اور بین الاقوامی پلیٹ فارمز پر ان کی ترقی میں سہولت فراہم کرنے کے عزم کا اعادہ کیا۔
پاکستان ٹینس فیڈریشن (PTF) کے صدر جناب اعصام الحق قریشی نے پاکستان 14 اور انڈر ٹیم کے سری لنکا کے دورے میں سہولت فراہم کرنے پر جناب یاسر پیرزادہ کا تہہ دل سے شکریہ ادا کیا۔
انہوں نے شایان آفریدی کو اس ناقابل یقین کامیابی پر دلی مبارکباد بھی پیش کی اور اسے پاکستان میں ٹینس کے لیے ایک اہم سنگ میل قرار دیا۔
ٹورنامنٹ کے اضافی نتائج میں راشد علی نے لڑکوں کے زمرے میں 32 شرکا میں سے 12 ویں پوزیشن حاصل کی۔
لڑکیوں کی کیٹیگری میں بسمل ضیاء اور ہاجرہ سہیل نے قابل ستائش کارکردگی کا مظاہرہ کرتے ہوئے 16 کھلاڑیوں میں سے بالترتیب 6ویں اور 7ویں پوزیشن حاصل کی۔