لاہور اور کراچی کا فضائی معیار خراب ہونے کی وجہ سے لاہور دنیا کے آلودہ ترین شہروں میں دوسرے اور کراچی چوتھے نمبر پر آگیا۔
لاہور اور کراچی کا فضائی معیار انتہائی مضر صحت ہے، صبح صبح لاہور کا ائیر کوالٹی انڈیکس236 اور کراچی کا 199 ریکارڈ کیا گیا جس کے سبب لاہور دنیا کے آلودہ ترین شہروں میں دوسرے جب کہ کراچی چوتھے نمبر پر آگیا۔
ادھر پنجاب کے مختلف علاقے شدید دھند اور اسموگ کی لپیٹ میں ہیں، ملتان پاکستان کا سب سے آلودہ ترین شہر ہے، جہاں اب سے کچھ دیر پہلے ائیر کوالٹی انڈیکس 400 ریکارڈ کیا گیا۔
اس کے علاوہ پنجاب کے بعض شہروں میں اسموگ میں کمی آئی ہے جس پر حکومت پنجاب نے لاہور اور ملتان ڈویژن کے سوا تمام اضلاع میں آج سے تعلیمی ادارے کھولنے کا اعلان کردیا۔
حکومت کے مطابق اسکول پونے 9 بجے سے پہلے نہیں کھلیں گے جب کہ پنجاب میں ہوٹل اور فوڈ آؤٹ لیٹس کو رات 10 بجے تک کھلا رکھنے کی اجازت دے دی گئی ہے۔