چیئرمین متحدہ قومی موومنٹ خالد مقبول صدیقی نے کہا ہے کہ مائیں بیٹیوں کو صرف چمٹا ہی نہیں نشتر پکڑنا بھی سکھائیں، بچیوں کو گھر چلانا ہی نہیں مُلک چلانا بھی سکھائیں، یہی ہمارے دین کا بھی تقاضہ ہے۔
سرجانی ٹاؤن میں متحدہ قومی موومنٹ کی تقریب سے خطاب کرتے ہوئے خالد مقبول کا کہنا تھا کہ کراچی اور حیدرآباد کے نوجوانوں نے بتا دیا ہے کہ و سب اُس تنظیم کے ساتھ کھڑے ہیں جس نے ایسی طرز سیاست دی جس نے ایوانوں کو ہلا دیا ہے۔
انہوں نے کہا کہ نوجوان تیار رہیں عنقریب کراچی، حیدرآباد، میرپورخاص میں دُنیا کی مایہ ناز جامعات کے کیمپس کھلنے جا رہے ہیں۔
ایم کیو ایم بہت جلد اِس شہر كو نوجوانوں کی تازہ دم قیادت دینے جا رہی ہے، وقت آگیا ہے ایک بار پھر نوجوانوں کو بلدیاتی کونسلز، صوبائی اور قومی اسمبلی میں بھیجا جائے۔
فاروق ستار کا کہنا تھا کہ کراچی کی آئندہ میئر لڑکی بھی ہو سکتی ہے، سیاسی اختلاف کو پرے رکھ کر اب شہر کی تعمیر و ترقی کیلئے ساتھ بیٹھنا ہوگا۔