کراچی کے علاقے لی مارکیٹ میں رہائشی عمارت کے فلیٹ سے چار خواتین کی گلا کٹی لاشیں برآمد ہوئی ہیں۔ ریسکیو نے لاشوں کو اسپتال منتقل کر دیا ہے۔
رپورٹ کے مطابق قتل کی گئی خواتین میں ماں، بیٹی، نواسی اور بہو شامل ہیں۔ قتل ہونے والی خواتین کی شناخت 18 سالہ مدیحہ، 19 سالہ عائشہ، 50 سالہ شہناز اور 12 سالہ علینہ کے ناموں سے ہوئی ہے۔
پولیس کے مطابق چاروں خواتین کے جسم پر تشدد کے نشانات موجود ہیں۔ واقعہ رہائشی عمارت کی ساتویں منزل پر واقع فلیٹ میں پیش آیا، چاروں لاشیں الگ الگ کمروں سے برآمد ہوئیں۔
پولیس کا کہنا ہے کہ چاروں خواتین کو تشدد کے بعد قتل کیا گیا ہے، کرائم سین یونٹ نے موقع پر پہنچ کر شواہد اکھٹے کیے اور تحقیقات کا آغاز کر دیا۔
گھر کے سربراہ محمد فاروق کا کہنا تھا کہ واردات کے وقت وہ اور اس کے دونوں بیٹے گھر پر موجود نہیں تھے، گھر کی خواتین کو کس نے قتل کیا ہے اس بارے میں انہیں کسی پر شک نہیں ہے۔