محکمہ موسمیات نے ملک بھر میں تیز ہواؤں کیساتھ بارش کے پیشگوئی کردی،رات سے ملک کے مختلف علاقوں میں شدید حبس کے بعد بارش کا سلسلہ شروع ہوا، دارالحکومت اسلام آباد، راولپنڈی میں وقفے وقفے سے بارش جاری ہے۔
گزشتہ 24 گھنٹوں کے دوارن شدید حبس کی وجہ دالبدین میں درجہ حرارت 47 ڈگری سنٹی گریڈ پر پہنچ گیا، اسی طرح دادو، سبی اور چلاس میں بھی درجہ حرارت 45 ڈگری سنتی گریڈ پر پہنچ گیا تھا۔
پنجاب میں سب سے زیادہ بارش گوجرانوالہ میں 31 ملی میٹر بارش ریکارڈ کی گئی جبکہ محکمہ موسمیات کے مطابق آج اتوار کے روز کشمیر، مشرقی پنجاب، خطہ پوٹھوہار، اسلام آباد، بالائی خیبرپختونخوا اور جنوب مشرقی سندھ میں تیز ہواؤں/ جھکڑ چلنے اور گرج چمک کے ساتھ بارش کا امکان ہے۔
ملک کے دیگر علاقوں میں موسم گرم اور شدید حبس رہنے کا امکان ہے، اسلام آباد اور گر دو نواح میں مطلع ابر آلود رہے گا جبکہ تیز بارش بھی متوقع ہے۔
کٹاریاں اور گوالمنڈی میں امدادی اداروں کیلئے پری الرٹ وارننگ جاری کردی، ریسکیو 1122، واسا اور انتظامیہ کاعملہ الرٹ ہے۔
محکمہ موسمیات کے مطابق مون سون سسٹم کے سبب بھمبرآزادکشمیر میں موسلا دھار بارش ہوئی جس کی وجہ سے برساتی نالوں میں طغیانی آگئی۔
ادھر گجرات میں تیز ہواؤں کے ساتھ بارش ہوئی، نشیبی علاقے زیرآب آ گئے اور سڑکوں اور گلیوں میں پانی جمع ہوگیا،اسی طرح شمال مشرقی پنجاب اور کشمیر میں موسلادھار بارش بھی متوقع ہے۔
محکمہ موسمیات کے مطابق مون سون ہواؤں کے باعث آج سے بدھ تک ملک بھر میں بارشیں ہوں گی، آج کشمیر، اسلام آباد، پنجاب اور بالائی خیبرپختونخوا میں بارش متوقع ہے۔
محکمہ موسمیات نے بتایا کہ سانگھڑ، میرپورخاص، عمر کوٹ، بدین اوردیگر ساحلی علاقوں میں مطلع جزوی ابرآلود رہنے کے علاوہ چند مقامات پرگرج چمک کے ساتھ بارش کا امکان ہے جبکہ کراچی میں کل سے بارش کا امکان ظاہر کیا گیا ہے۔