پاک نیوز-یوم پاکستان کی مناسبت سے مسلح افواج کی پریڈ کی اہم تقریب اسلام آباد میں ہوگی، جس میں صدرمملکت ڈاکٹر عارف علوی، وزیراعظم عمران خان، مسلح افواج کے سربراہان اور دیگر اہم سیاسی، سماجی اور مذہبی شخصیات اور غیر ملکی مہمان شرکت کریں گے۔
اسلام ٹائمز۔ ملک بھر میں یوم پاکستان قومی و ملّی جوش و جذبے کے ساتھ منایا جائے گا، دن کا آغاز مساجد میں خصوصی دعاؤں سے ہوگا، پاک فوج کی طرف سے توپوں کی سلامی دی جائے گی۔ یہ دن 23 مارچ 1940ء کو آل انڈیا مسلم لیگ کے اجلاس میں منظور کی گئی قرارداد کی یاد میں منایا جاتا ہے جس کی روشنی میں برصغیر کے مسلمانوں نے اپنے لئے ایک علیحدہ وطن کا خواب شرمندہ تعبیر کیا۔ یہ قرارداد لاہور منٹو پارک میں میں پیش کی گئی جہاں اس کی یادگار کے طور پر مینار پاکستان تعمیر کیا گیا۔ منٹوپارک کے مقام پر آج گریٹر اقبال پارک موجود ہے۔ اس دن کی مناسبت سے ملک بھر میں عام تعطیل ہوگی۔ تمام سرکاری و نجی عمارتوں پر قومی پرچم لہرائے جائیں گے، پاک فوج کی طرف سے وفاقی دارالحکومت میں 31 جبکہ صوبائی دارالحکومتوں میں 21،21 توپوں کی سلامی دی جائے گی۔
یوم پاکستان کی مناسبت سے مسلح افواج کی پریڈ کی اہم تقریب اسلام آباد میں ہوگی، جس میں صدرمملکت ڈاکٹر عارف علوی، وزیراعظم عمران خان، مسلح افواج کے سربراہان اور دیگر اہم سیاسی، سماجی اور مذہبی شخصیات اور غیر ملکی مہمان شرکت کریں گے۔ کراچی میں قائد اعظم جبکہ لاہور میں مزار اقبال پر گارڈز کی تبدیلی کی پر وقارتقریب ہوگی، جس میں اعلیٰ حکومتی، عسکری شخصیات کی شرکت متوقع ہے، اس کے بعد عام شہریوں کو مزار اقبال اور قائد اعظم کی قبور پر حاضری دینے کی اجازت دی جائے گی۔ پاکستان میں بسنے والی اقلیتیں بھی یوم پاکستان بھرپور طریقے سے منائیں گی، گرجا گھروں، مندروں اور گوردواروں میں بھی ملکی سلامتی اور امن و امان کے لیے خصوصی دعائیں کی جائیں گی۔