اسپیکر سندھ اسمبلی کیلئے پیپلز پارٹی کے اویس قادر شاہ اور ایم کیو ایم پاکستان کی صوفیہ سعید شاہ کے درمیان مقابلہ جاری ہے،اسپیکر آغا سراج درانی کی زیر صدارت ہونے والے اجلاس میں سنی اتحاد کونسل میں شامل ہونے والے 9 آزاد ارکان اور جماعت اسلامی کے رکن محمد فاروق نے حلف اٹھایا۔
پیپلز پارٹی کے نامزد وزیراعلیٰ مراد علی شاہ نے کہا کہ آج اسمبلی میں حلف اٹھانے والے اراکین کو ویلکم کرتا ہوں، سندھ کے عوام کی خدمت کا سلسلہ جاری رکھیں گے۔
آغا سراج درانی نے شرجیل میمن، سعید غنی، ندا کھوڑو اور علی خورشیدی کو پینل آف اجلاس نامزد کیا،اسپیکر اور ڈپٹی اسپیکر سندھ اسمبلی کا چناؤ خفیہ رائے شماری کے ذریعے ہو رہا ہے جس کا باقاعدہ آغاز ہو چکا ہے۔
خیال رہے کہ اسپیکر کے پیپلز پارٹی کے اویس قادر شاہ اور ڈپٹی اسپیکر نوید انتھونی کے کاغذات درست قرار دے دیے گئے جبکہ ایم کیوایم پاکستان کی نامزد کردہ اسپیکر کی امیدوار صوفیہ سعید شاہ اور ڈپٹی اسپیکر کیلئے راشد خان کے کاغذات نامزدگی بھی درست قرار پائے۔
سندھ اسمبلی کے 147 اراکین نے حلف اٹھایا تھا جبکہ آج 10 اراکین نے حلف اٹھایا جس کے بعد 168 کے ایوان میں حلف اٹھانے والے اراکین کی تعداد 157 ہو گئی ہے۔