پی ٹی آئی ممنوعہ فنڈنگ کیس کے ملزم طارق شفیع کو اسلام آباد ہائی کورٹ سے ریلیف مل گیا،عدالت نے طارق شفیع کا نام پاسپورٹ کنٹرول لسٹ سے نکال کر بیرون ملک جانے کی اجازت دے دی ہے۔
اسلام آباد ہائی کورٹ کے جسٹس طارق محمود جہانگیری نے پی ٹی آئی ممنوعہ فنڈنگ کیس میں اہم ملزم طارق شفیع کا نام پاسپورٹ کنٹرول لسٹ سے نکالنے کا 6 صفحات پر مشتمل تحریری فیصلہ جاری کیا۔
عدالت نے طارق شفیع کا نام پاسپورٹ کنٹرول لسٹ (پی سی ایل) سے نکالنے کی ہدائت کرتے ہوئے ڈی جی پاسپورٹ کو ایک ہفتے میں رپورٹ عدالت میں جمع کرانے کا حکم دیا ہے۔
عدالت نے فیصلے میں لکھا ہے کہ اسی کیس میں ایک اور ملزم فیصل مقبول شیخ کا نام 20 جولائی 2023ء کو نکالنے کا حکم ہوا، 23 جنوری 2023ء کو طارق شفیع کا نام پی سی ایل پر ڈالا گیا۔
عدالت نے فیصلے میں لکھا ہے کہ ایڈیشنل اٹارنی جنرل نے بتایا یہ بھی فیصل مقبول شیخ اور شیریں مزاری کیس جیسا ہے، دونوں کیسز میں عدالت نے پی سی ایل سے نام نکالنے کا حکم دیا، دونوں فیصلے فیلڈ میں ہیں۔