عوامی نیشنل پارٹی (اے این پی) کے خیبرپختونخوا کے صدر ایمل ولی خان نے کہا ہے کہ آزاد امیدوار کو ووٹ دینا پرویز خٹک کو ووٹ دینا ہے، آزاد امیدوار بکیں گے اور لوٹے تو ضرور بکیں گے۔
انہوں نے چارسدہ میں انتخابی جلسے سے خطاب میں کہاکہ ہم دہشت گردی سے بُری طرح متاثر ہوئے، 2013 کے انتخابات میں انتخابی مہم تک چلانے نہیں دی گئی، میں اپنے بچے کیلئے بندوق نہیں چاہتا، ہمیں پرائی جنگوں میں جھونکا گیا۔
ہم صوبوں کو جائز حقوق دینا چاہتے ہیں، 18 ویں ترمیم کے ذریعے صوبائی خود مختاری حاصل کی، بجلی ہم بنا رہے ہیں اور زیادہ لوڈشیڈنگ برداشت کر رہےہیں، گیس ہماری ہے لیکن ہم اس سے محروم ہیں۔
آزاد امیدوار بکیں گے اور لوٹے تو ضرور بکیں گے، بعض امیدواروں کو لوٹا کہنا بھی لوٹے کی توہین ہے، آزاد امیدوار ایک تھپڑ سے پرویز خٹک کے ساتھ شامل ہونگے، آزاد امیدوار کو ووٹ دینا پرویز خٹک کو ووٹ دینا ہے۔