آصف زرداری نے پرویزالہیٰ کو حکومتی امیدوار برائے وزیراعلیٰ بنانے کی پیشکش کر دی

پاکستان تحریک انصاف اور مسلم لیگ ق پر مشتمل پنجاب اسمبلی میں اپوزیشن اتحاد نے 22 جولائی کو وزیر اعلیٰ کے انتخاب میں اپنے امیدوار چودھری پرویز الٰہی کی کامیابی کیلئے حکمت عملی طے کر لی ہے۔ دوسری طرف آصف زرداری نے پرویز الہٰی کو حکومتی امیدوار بنانے کی پیشکش کر دی ہے۔ ادھر وزیر اعظم میاں شہباز شریف نے فون پر رابطہ کرکے چودھری شجاعت حسین سے سیاسی صورتحال پر تبادلہ خیال کیا۔ "روزنامہ جنگ” کی رپورٹ کے مطابق وزیر داخلہ رانا ثناء اللّٰہ کے اپوزیشن کے کچھ ارکان کو اسمبلی اجلاس میں شرکت سے روکنے کے بیان کے بعد پی ٹی آئی کے ارکان کو ممکنہ گرفتاریوں اور حکومتی حربوں سے بچانے کے لیے اجلاس سے قبل محفوظ مقامات پر اکٹھے رکھنے کا پروگرام بنایا گیا ہے تاکہ اپوزیشن ارکان حکومتی دسترس سے دور رہیں۔

گزشتہ روز آصف علی زرداری مسلم لیگ ق کے سربراہ چودھری شجاعت حسین سے ملاقات کرنے ان کی رہائش گاہ پہنچ گئے اور میاں شہباز شریف کی رہائش گاہ پر حکومت کی اتحادی جماعتوں کے اجلاس کے فیصلوں پر اعتماد میں لیا اور چودھری شجاعت حسین کو چودھری پرویز الہٰی کو منانے کے درخواست کی اور کہا کہ آپ کے تعاون سے ہی حکومت آگے چل سکتی ہے۔ آصف زرداری نے کہا کہ وہ چودھری پرویزالہیٰ کو حکومتی امیدوار بنانے کیلئے وزیراعظم سے بات کرنے کو تیار ہیں ورنہ آپ حمزہ شہباز کو وزیراعلیٰ پنجاب بنانے میں سپورٹ کریں اور پارٹی کے ارکان کو انہیں ووٹ دینے کی ہدایت کریں۔ چودھری شجاعت حسین نے اس پر خاموشی اختیار کی۔

آصف علی زرداری سے ملاقات میں چودھری شجاعت حسین کے خاندان کے افراد بھی موجود تھے۔ بند کمرے میں ہونیوالی یہ ملاقات ایک گھنٹے سے زائد جاری رہی۔ آصف علی زرداری ملاقات کے بعد مسکراتے اور فتح کا نشان بناتے ہوئے واپس روانہ ہوئے۔