مسلم لیگ ن کے رہنما کیپٹن ریٹائرڈ صفدر اعوان نے کہا ہے کہ پارٹی قائد نواز شریف قومی اسمبلی کے حلقہ این اے 15 مانسہرہ سے الیکشن لڑیں گے۔
کل بروز جمعرات 21 دسمبر کو نواز شریف کے کاغذات نامزدگی جمع کرا دیں گے،نواز شریف مانسہرہ سے ایم این اے بن کر چوتھی بار وزیراعظم بنیں گے۔
نواز شریف وزیراعظم بن کر خیبرپختونخوا کی 24 سالہ محرومیوں کا ازالہ کریں گے، امیر مقام خیبرپختونخوا کے اگلے وزیراعلیٰ ہوں گے۔
انہوں نے اپنے الیکشن نہ لڑنے کا اعلان کرتے ہوئے بتایا کہ مریم نواز قومی و صوبائی اسمبلی کی سیٹوں سے پنجاب سے الیکشن لڑیں گی۔
یاد رہے کہ قومی اسمبلی کا حلقہ این اے 15 مسلم لیگ ن کا مضبوط حلقہ تصور کیا جاتا ہے، 2018 کے انتخابات میں اس حلقے سے کیپٹن صفدر کے بھائی کامیاب ہوئے تھے جبکہ 2013 سے اسی حلقے سے کیپٹن ریٹائرڈ صفدر نے کامیابی حاصل کی تھی۔