وزیر خارجہ بلاول بھٹو زرداری کا کہنا ہے کہ پاکستان نے دو مرتبہ فیٹف ایکشن پلانز پر مکمل عملدرآمد کیا، اور اب فیٹف اقدامات کو مستقبل میں بھی جاری رکھے گا۔
فیٹف کی جانب سے پاکستان دورہ پاکستان کے اعلان کا خیر مقدم کرتے ہوئے چیئرمین پیپلزپارٹی اور وزیرخارجہ بلاول بھٹو زرداری کا کہنا تھا کہ فیٹف کا پاکستان کے دورے کا اعلان خوش آئند پیشرفت ہے، فیٹف ٹاسک فورس کو پاکستان آمد پرخوش آمدید کہتے ہیں۔
وزیرخارجہ کا کہنا تھا کہ امید ہے معائنہ ٹیم کے دورے کے بعد پاکستان گرے لسٹ سے نکل جائے گا، فیٹف کے اقدام سے پاکستان میں سرمایہ کاروں کا اعتماد مزید بڑھے گا۔
بلاول بھٹو نے کہا کہ پاکستان کے ایکشن پلانز کی تکمیل پر ایف اے ٹی ایف کا متفقہ اعتراف قابل قدر ہے، فیٹف نے پاکستان کے مثبت اقدامات کو سراہا، فیٹف کے اہداف پورے کرنے پر تمام ٹیم تعریف کی مستحق ہے۔
وزیرخارجہ کا کہنا تھا کہ پاکستان نے 2018، 2021ء کے ایکشن پلانز کامیابی سے مکمل کیے، پاکستانی ٹیم کی محنت سے ایکشن پلانزکی تکنیکی ضروریات کو کامیابی سے مکمل کیا گیا، یہ مشترکہ قومی کوششوں، اسٹیک ہولڈرز کے مفادات کی ہم آہنگی کا نتیجہ تھا جس پر سب مبارکباد کے مستحق ہیں۔
بلاول بھٹو نے کہا کہ پاکستان نے دو مرتبہ فیٹف ایکشن پلانز پر مکمل عملدرآمد کیا، پاکستان اب فیٹف اقدامات کو مستقبل میں بھی جاری رکھے گا۔