نگران وزیر اعلیٰ بلوچستان علی مردان خان ڈومکی نے کہا کہ نہتے مزدوروں کا قتل اندوہناک واقعہ ہے، ملوث عناصر کو کیفرکردار تک پہنچایا جائے گا۔
دہشت گردی کا واقعہ قابل مذمت اور ناقابل برداشت ہے، دنیا کا کوئی مذہب دہشتگردی کی اجازت نہیں دیتا، بلوچستان کی روایت تو مہمان نوازی ہے نہ کہ گھر آئے مہمان کی جان لینا۔
امن دشمن عناصر ہماری روایات کے بھی دشمن ہیں، امن کی بحالی کی کوششوں کو سبوتاژ ہونے نہیں دیں گے،امن کی بحالی کیلئے سکیورٹی فورسز کے بہادر جوانوں کی قربانیاں رائیگاں نہیں جائیں گی، امن دشمن عناصر کی سرکوبی کیلئے آخری حد تک جائیں گے۔
سرکاری اعلامیہ کے مطابق تربت کے علاقے ناصر آباد میں پولیس تھانے پر فائرنگ کے واقعے میں چار مزدوروں کی ہلاکت کے بعد ایس پی کو سینٹرل پولیس آفس رپورٹ کر نے کی ہدایت کی گئی ہے جبکہ کوئٹہ کے علاقے سریاب میں تعینات ایس پی ضیا مندوخیل کو ایس پی تربت تعینات کر دیا گیا ہے۔