سابق گورنر پنجاب چودھری سرور کے نون لیگ سے معاملات طے پا گئے ہیں۔ ذرائع کا کہنا ہے کہ چودھری سرور بہت جلد (ن) لیگ میں شمولیت کا اعلان کریں گے، وہ نون لیگ کے ٹکٹ پر قومی اسمبلی کا انتخاب بھی لڑیں گے۔ ذرائع کا بتانا ہے کہ سابق گورنر چودھری سرور لاہور کے علاقہ شاہدرہ کے حلقہ سے انتخاب لڑیں گے، وہ عمرہ ادائیگی کے بعد آج صبح ہی پاکستان پہنچے ہیں۔ اس حوالے سے ذرائع کا کہنا ہے کہ سعودی عرب روانگی سے قبل چودھری سرور کی نون لیگی قیادت سے ملاقات ہوئی تھی۔
ملاقات میں چودھری سرور کو گورنر پنجاب بنانے کی پیشکش کی گئی تھی۔ ذرائع نے کہا کہ چودھری سرور کی طرف سے لاہور سے انتخاب لڑنے کی خواہش پر لیگی قیادت نے کچھ وقت مانگا تھا۔ دوسری ملاقات چودھری سرور کے بیٹے انس سرور اور نواز شریف کے درمیان لندن میں ہوئی تھی، نواز شریف سے ملاقات کے دوران معاملات طے پائے تھے۔ ذرائع کا کہنا ہے کہ انس سرور نے میاں نواز شریف کو ماضی میں پیش آنیوالے معاملات کے حوالے سے آگاہ کیا، جس پر دونوں نے ماضی کی تلخیاں بھُلا کر نئے عزم سے نئی شروعات کرنے پر اتفاق کیا۔