ڈاکٹر رضا باقر کی مدت ختم، ڈاکٹر مرتضیٰ سید نئے گورنر اسٹیٹ بینک مقرر

وفاقی مشیر خزانہ مفتاح اسماعیل نے کہا ہے کہ گورنر اسٹیٹ بینک ڈاکٹر رضا باقر کی مدت ختم ہوگئی، ڈاکٹر مرتضیٰ سید نئے گورنر اسٹیٹ بینک کا عہدہ سنبھالیں گے۔ مشیر خزانہ مفتاح اسماعیل نے گورنر اسٹیٹ بینک ڈاکٹر رضا باقر کی تین سالہ مدت پوری ہونے پر سماجی رابطوں کی ویب سائٹ ٹوئٹر پر ٹوئٹ کرتے ہوئے قوم کو آگاہ کیا ہے کہ ڈاکٹر مرتضیٰ سید نئے گورنر اسٹیٹ بینک کا عہدہ سنبھالیں گے۔ مفتاح اسماعیل نے اپنے ٹوئٹ میں لکھا ہے کہ گورنر اسٹیٹ بینک ڈاکٹر رضا باقر کی تین سالہ مدت ختم ہوگئی، سینئر ترین ڈپٹی گورنر اس وقت تک ان کا عہدہ سنبھالیں گے۔

انہوں نے اپنے ٹوئٹ میں یہ بھی لکھا ہے کہ نئے گورنر اسٹیٹ بینک ڈاکٹر مرتضیٰ سید آئی ایم ایف کا بھرپور تجربہ رکھتے ہیں اور ان کے نئے کردار کیلئے نیک خواہشات کا اظہار کرتا ہوں۔ واضح رہے کہ گزشتہ روز مشیر خزانہ مفتاح اسماعیل نے گورنر اسٹیٹ بینک کو تبدیل کرنے کا عندیہ دیا تھا۔ وزیر خزانہ مفتاح اسماعیل نے اپنے ٹوئٹ میں کہا تھا کہ کل گورنر اسٹیٹ بینک رضا باقر کی 3 سالہ مدت پوری ہوگی، میں نے رضا باقر سے بات کی اور ان کو حکومتی فیصلے سے آگاہ کردیا ہے۔