اے ایس پی صدر سرکل زینب ایوب نے کہا ہے کہ خواتین اور بچوں پر تشدد کے واقعات پر قابو پانے کےلئےُ راولپنڈی پولیس کی کاوشیں قابل ستائش ہیں،جرائم پیشہ سرگرمیوں میں ملوث خواتین کو معاشرے کا فعال رکن بنانے کے لئے کونسلگ کی ضرورت ہے تاکہ وہ ہنر مند بن کر روزگار کے زریعے آمدنی حاصل کرسکیں۔
اے ایس پی صدر سرکل زینب ایوب نے سرکاری نیوز ایجنسی سے گفتگو کرتے ہوئے کہا کہ صدر سرکل میں اعلیٰ افسران کی سربراہی میں روزانہ کی بنیاد پر منشیات فروشی،قمار بازی،غیرقانونی اسلحہ اور دیگر جرائم میں ملوث ملزمان کے خلاف کاروائیاں کی جاتی ہیں۔
انہوں نے کہا ہے کہ سٹی پولیس آفیسر سید خالد ہمدانی کی ہدایت پر سماج دشمن عناصر کا قلع قمع کرنے لئے ہر وقت تیار رہتے ہیں اور شہریوں کے جان ومال کا تحفظ ہماری اہم زمہ داری ہے۔زینب ایوب نے کہا کہ صدر سرکل میں قبضہ مافیا کے خلاف بڑے آپریشن کئے گئے اور درجنوں ملزمان گرفتار کر کے ان سے بھاری اسلحہ برآمد کیا گیا۔
انہوں نے کہا کہ ڈکیتی ،چوری اور راہزنی کی وارداتوں میں ملوث گینگز کے خلاف بھی کریک ڈاؤن کیا جا رہا ہے اور شہریوں سے لوٹ مار کرنے والے متعدد گینگز کے ملزمان کو گرفتار کر کے چالان عدالتوں میں پیش کئے گئے۔