کشمیری حریت پسند رہنما یاسین ملک کی اہلیہ مشعال ملک نے کہا ہےکہ بھارت کے اس فالس فلیگ آپریشن کا مقصد کشمیر کی تحریکِ آزادی کو بدنام کرناہے۔
انہوں نے کہا کہ بھارت کے اس فالس فلیگ آپریشن کی مذمت کرتے ہيں اور بھارتی دہشت گردی کو مسترد کرتے ہيں۔
اپنے ایک پیغام میں مشعال ملک نےکہاکہ پہلگام فائرنگ بالکل سکھوں کا چھٹی سنگھ پورہ قتلِ عام جیسا واقعہ ہے، بھارت نے سال 2000 میں امریکی صدر بل کلنٹن کے دورے کے موقع پر 35 سکھوں کو قتل کر کے کشمیریوں کو بدنام کرنے کی کوشش کی تھی۔
مشعال ملک نے کہا کہ اب بھارت کے دورے پر موجود امریکی نائب صدر جے ڈی وانس کو گودی میڈیا کی جھوٹی خبروں کا شکار نہیں بننا چاہیے۔
خیال رہے کہ آج مقبوضہ جموں و کشمیر کے سیاحتی مقام پہلگام میں نامعلوم افراد کی فائرنگ سے 27 سیاح ہلاک جبکہ 12 زخمی ہوگئے ہیں۔
بھارتی میڈیا کے مطابق سیاحوں میں سے کئی کا تعلق بھارتی ریاست گجرات اور کرناٹکا سے ہے۔
فائرنگ کے واقعے کے بعد بھارتی میڈیا کی جانب سے من گھڑت اور چھوٹا پروپیگنڈا بھی شروع کردیا ہے۔