اماراتی نائب وزیراعظم و وزیرخارجہ شیخ عبداللہ بن زاید نے دفتر خارجہ کا دورہ کیا اور نائب وزیراعظم اسحاق ڈار سے ملاقات کی۔
رپورٹ کے مطابق یو اے ای کےنائب وزیراعظم و وزیرخارجہ شیخ عبداللہ بن زاید کی دفتر خارجہ آمد ہوئی جہاں نائب وزیراعظم اسحاق ڈار نے ان کا استقبال کیا۔
اس موقع پر پاکستان اور یو اے ای کے درمیان مفاہمت کی یادداشتوں پر دستخط کی تقریب ہوئی جس میں قومی ورثہ و ثقافت ڈویژن اور وزارت ثقافت یو اے ای کے درمیان ثقافتی تعاون کی یادداشت پر دستخط ہوئے۔
اس کے ساتھ ہی خارجہ وزارتوں کے درمیان قونصلر امور کے لیے مشترکہ کمیٹی کے قیام پر تعاون اور یو اے ای پاکستان مشترکہ بزنس کونسل کے قیام کے لیے تعاون کی یادداشت پر دستخط ہوئے
یادداشت فیڈریشن آف پاکستان چیمبر آف کامرس اور یو اے ای ایوان صنعت و تجارت کے درمیان طے پائی ہے۔
اس موقع پر اسحاق ڈار نے کہا کہ معزز مہمان کو اپنے گھر میں خوش آمدید کہتا ہوں، خواہش ہے کہ آپ کا دورہ کامیاب ہو ، بہت سے منصوبوں پر ہم مشترکہ طور پر کام کررہے ہیں ، پاکستان اور یو اے ای کے درمیان برادرانہ تعلقات ہیں۔
اس موقع پر شیخ عبداللہ بن زاید نے کہا کہ پر تپاک استقبال پر نائب وزیراعظم اسحاق ڈار کا شکر گزار ہوں، پاکستان کے ساتھ تعلقات کو مزید مضبوط کریں گے، پاکستان کے لوگ یو اے ای کی ترقی میں اہم کردار ادا کررہے ہیں۔