وفاقی وزیر داخلہ محسن نقوی نے کہا ہے کہ منشیات کی سمگلنگ روکنے کیلئے مؤثر حکمت عملی ضروری ہے۔
پاک، خلیج انسداد منشیات کانفرنس سے خطاب کرتے ہوئے وزیر داخلہ محسن نقوی کا کہنا تھا کہ منشیات کی سمگلنگ اور اس کے استعمال کو روکنے کیلئے تعاون کو مزید مستحکم کرنے، انٹیلی جنس کے تبادلے اور مؤثر حکمت عملی وضع کرنے کی ضرورت ہے۔
انہوں نے کہا کہ یہ کانفرنس اینٹی نارکوٹکس فورس کی میزبانی میں منشیات سے پاک دنیا کے مشترکہ وژن کے تحت منعقد ہو رہی ہے، حکومت خلیجی ریاستوں کے ساتھ انسدادِ منشیات کے ہر شعبے میں تعاون کو مزید وسعت دینے کیلئے تیار ہے۔
ان کا کہنا تھا کہ آج ہم صرف اپنی ریاستوں کے نمائندے نہیں بلکہ عالمی محاذ پر صفِ اول کے سپاہی بن کر منشیات کے خلاف یہاں اکٹھے ہیں، خلیجی ممالک کے وفود کی یہاں موجودگی ہمارے مشترکہ عزم کی مظہر ہے۔
محسن نقوی نے انٹیلی جنس شیئرنگ، مشترکہ تربیت، حقیقی وقت میں رابطہ اور فرانزک و تکنیکی اشتراک جیسے میدانوں میں اشتراک کو فروغ دینے کی ضرورت پر زور دیتے ہوئے کہا کہ ہم مل کر اس لعنت کے خلاف مؤثر اقدامات اٹھا سکتے ہیں اور نوجوان نسل اور معاشروں کے محفوظ مستقبل کو یقینی بنا سکتے ہیں۔