وفاقی وزیر داخلہ محسن نقوی نے ڈی پورٹ افراد کے پاسپورٹ بلاک کیے جانے کی ہدایت پر 100 فیصد عمل درآمد یقینی بنانے کی ہدایت کردی۔
اسلام آباد میں وفاقی وزیر داخلہ محسن نقوی نے ڈائریکٹوریٹ آف امیگریشن اینڈ پاسپورٹ کا دورہ کیا۔
وزیر داخلہ محسن نقوی کی زیر صدارت ڈائریکٹوریٹ آف امیگریشن اینڈ پاسپورٹ میں اہم اجلاس بھی ہوا جس میں وزیر مملکت داخلہ طلال چوہدری، سیکرٹری داخلہ محمد خرم آغا، ڈی جی ایف آئی اے رفعت مختار راجہ اور ڈی جی پاسپورٹ مصطفیٰ جمال قاضی نے شرکت کی۔
وزیرداخلہ محسن نقوی نے پاسپورٹ کے حصول کے لیے نئی شرائط کے تمام قانونی امور جلد از جلد مکمل کرنے کی ہدایت کی۔
وزیر داخلہ کا کہنا تھا کہ نئی شرائط سے بھکاریوں اور غیر قانونی امیگریشن کی روک تھام ہو گی، ڈی پورٹ ہونے والے افراد کے پاسپورٹ بلاک کیے جانے کی ہدایت پر 100 فیصد عمل درآمد یقینی بنایا جائے۔
وزیر مملکت برائے داخلہ طلال چوہدری نے کہا اس فیصلے سے بین الاقوامی برادری کو مثبت پیغام جائے گا۔
اجلاس میں ڈی جی پاسپورٹ نے بتایا کہ شہریوں کی سہولت کے لیے جلد موبائل ایپ لانچ کی جائےگی۔