وزیراعلیٰ پنجاب مریم نواز نے صوبے میں نئے سہولت بازار قائم کرنے کی منظوری دیدی۔
وزیراعلیٰ مریم نواز نے 13 نئے سہولت بازاروں کے زیر تکمیل پراجیکٹس جلد مکمل کرنے کا حکم دے دیا جس کیلئے اگست کی ڈیڈ لائن مقرر کی گئی ہے، پراجیکٹس کے تحت نوشہرہ ورکاں، بورے والا، کبیروالا، سانگلہ اور جلال پور میں سہولت بازار بنیں گے، بہاولپور، اٹک اور مری میں بھی اضافی سہولت بازار قائم کرنے کا اصولی فیصلہ کیا گیا ہے۔
وزیراعلیٰ نے ضلعی انتظامیہ کو سہولت بازاروں کیلئے اراضی مختص کرنے کی ہدایت کر دی اور سہولت بازاروں کے قیام کا پلان بھی طلب کر لیا۔
مریم نواز نے سہولت بازاروں کو سولر انرجی پر منتقل کرنے کی منظوری بھی دے دی، سولر انرجی پر منتقل کرنے سے سہولت بازاروں میں بجلی کی لاگت میں 70 فیصد تک کمی آئے گی، بجلی کی لاگت میں کمی کا فائدہ نرخ میں کمی کر کے عوام تک پہنچایا جائے گا، سہولت بازاروں کی شمسی توانائی پر منتقلی کیلئے 69 کروڑ سے زائد فنڈز کی بھی منظوری دے دی گئی۔
وزیراعلیٰ پنجاب نے جہلم، مظفر گڑھ اور نارووال میں سہولت بازار کے قیام میں درپیش رکاوٹیں دور کرنے کی ہدایت کر دی، رحیم یار خان، بہاولنگر، اٹک اور مری میں سہولت بازار کیلئے اراضی کی نشاندہی کا عمل جلد مکمل کرنے کا حکم بھی دے دیا۔
مریم نواز شریف کا کہنا تھا کہ سہولت بازار قائم کرنے کا مقصد کمزور اور متوسط طبقے کو اشیاء کم نرخ پر فراہم کرنا ہے، قائد محمد نواز شریف کے ویژن کے تحت مہنگائی کا خاتمہ کیا جا رہا ہے۔