پیپلزپارٹی کی مختلف شہروں میں دریائے سندھ پر 6 کینالوں کے منصوبے کے خلاف احتجاجی مشعل بردار ریلیاں نکالی گئیں۔
پیپلزپارٹی کے ذرائع کے مطابق سندھ کے صدر نثار کھوڑو کی قیادت میں دریائے سندھ پر 6 کینالوں کے منصوبے کے خلاف میروخان میں بھٹو پیٹرول پمپ سے عرضی بھٹو چوک تک احتجاجی مشعل بردار ریلی نکالی گئی۔
ذرائع نے بتایا کہ مشعل بردار ریلی میں شامل سیکڑوں پیپلز پارٹی کے کارکنان کی سندھو دریا پر کینال نامنظور کی نعرے بازی کی ، صدر پی پی پی سندھ نثار کھوڑو کا مشعل بردار ریلی سے خطاب کیا۔
نثار کھوڑو کا کہنا تھا کہ 6 کینالوں کا منصوبہ سندھ اور سندھ کے لوگوں کے لیے موت کا منصوبہ اور سندھ کے وجود کے خلاف سازش ہے، پانی زندگی ہے اور پیپلز پارٹی کسی کو بھی سندھ کے لوگوں کی زندگیوں سے کھیلنے نہیں دے گی، منصوبہ غیر آئینی اور غیرقانونی ہے اس لیے وفاقی حکومت کینال منصوبے سے دستبرداری کا اعلان کرے، اگر مسلم لیگ (ن) کی وفاقی حکومت کینالوں کے لیے بضد ہے تو سندھ بھی کینالوں کے خلاف ایک ہے۔
انہوں نے کہا کہ کوٹری سے نیچے پانی نہ ہونے کہ وجہ سے سندھ کی 40 لاکھ ایکڑ سے زائد اراضی بنجر بن گئی ہے، سندھ کے دریا پانی کی سخت کمی کی وجہ سے کربلا کا منظر پیش کر رہے ہیں، ارسا کی جانب سے نگران حکومت میں پانی کی اضافی موجودگی کے سرٹیفکیٹ جاری کرنا غیر آئینی اور سندھ دشمنی عمل ہے۔
پیپلزپارٹی سندھ کے صدر کا کہنا تھا کہ ارسا کی از سر نو تشکیل کی جائے اور ارسا چیئرمین سمیت ارسا میں وفاقی رکن سندھ سے لیا جائے، سندھ نے ارسا کے یکطرفہ پانی موجودگی کے فیصلے کو سی سی آئی میں چیلنج کردیا ہے، سی سی آئی کا اجلاس بلا کر سندھ کے آئینی اعتراضات سن کر متنازعہ کینال منصوبہ ختم کیا جائے، پیپلز پارٹی دریائے سندھ پر کوئی کینال نہیں بننے دے گی نہ ہی کسی کو پانی پر ڈاکہ ڈالنے دیں گے۔
نثار کھوڑو کا کہنا تھا کہ پیپلز پارٹی نے ماضی میں بھی تھل کینال اور کالاباغ ڈیم کے خلاف تحریک چلائی اب بھی 6 کینالوں کے خلاف تحریک چلائیں گے، پورے سندھ میں کینالوں کے خلاف مشعل بردار ریلیاں نکال کر عوام نے بتادیا ہے کہ سندھ کو 6 کینالوں کا منصوبہ کسی صورت قبول نہیں ہے، پانی کے مسئلے پر مشترکہ جدوجہد اور ایک آواز بننے کی ضرورت ہے، جس طرح مشترکہ جدوجہد کے ذریعے کالاباغ ڈیم منصوبے کو مسترد کرایا تھا اسی طرح 6 کینال منصوبے کو بھی مسترد کرائیں گے۔
انہوں نے مشعل بردار ریلی سے خطاب کرتے ہوئے مزید کہا کہ پیپلز پارٹی نےسڑکیں، راستے بھی دیکھے ہوئے ہیں اور تحریکیں بھی چلانی آتی ہیں اس لیے سندھ دشمن منصوبوں سے باز آجاؤ۔