قومی عوامی تحریک کے سربراہ ایاز لطیف پلیجو کا کہنا ہے کہ چولستان کینال سندھ کے لیے ایٹم بم سے زیادہ خطرناک ہے جب کہ پیپلزپارٹی اور (ن) لیگ مل کر سندھ کو تباہ کر رہی ہیں۔
دریائے سندھ سے کینالز نکالنے کے منصوبے کے خلاف قومی عوامی تحریک سمیت دیگر تنظیموں کی جانب سے احتجاجی ریلیاں نکالی گئیں۔
کوٹ غلام محمد میں ریلی سے خطاب کرتے ہوئے قومی عوامی تحریک کے سربراہ ایاز لطیف پلیجو نے کہا کہ چولستان کینال سندھ کے لیے ایٹم بم سے زیادہ خطرناک ہے، پیپلزپارٹی اور (ن) لیگ مل کر سندھ کو تباہ کر رہی ہیں۔
انہوں نے مزید کہا کہ پیپلز پارٹی دریائے سندھ پر حملہ کرنے والوں کے ساتھ ہے، دریائے سندھ پر کینال نکالنے کا کوئی منصوبہ قبول نہیں کیا جائےگا۔
اس کے علاوہ عوامی تحریک اور سندھیانی تحریک کی جانب سے بھی کے این شاہ میں احتجاجی ریلی نکالی گئی، کینالز منصوبے کے خلاف میہڑ بار ایسوسی ایشن نے 9 ویں روز بھی احتجاج کیا جب کہ جسقم کے کارکنوں نے مورو کے قریب قومی شاہراہ پر دھرنا دیا۔