رمضان المبارک کا دوسرا عشرہ آج اختتام پذیر ہوگا، ملک بھر کی مساجد میں اعتکاف کی تیاریاں حتمی مراحل میں پہنچ گئیں۔
ملک بھر کی طرح اسلام آباد کی مساجد میں بھی اعتکاف تیاریاں مکمل ہو گئیں، ہزاروں کی تعداد میں فرزاندان اسلام آج اعتکاف بیٹھیں گے۔
فیصل مسجد اور اسلام آباد کی دیگر مساجد میں اعتکاف کے انتظامات مکمل کر لئے گئے، فیصل مسجد میں 600 سے زائد لوگ اعتکاف بیٹھیں گے۔
فیصل مسجد انتظامیہ کا کہنا ہے کہ اعتکاف بیٹھنے والوں سے اس سال بھی کوئی فیس نہیں لی، اعتکاف بیٹھنے والوں کے کھانے پینے کیلئے مسجد کے احاطے میں سٹال لگا دیئے گئے ہیں۔
انتظامیہ کے مطابق فیصل مسجد میں آخری عشرے میں قیام اللیل کا بھی اہتمام کیا گیا ہے۔
داتا دربار
ادھر محکمہ اوقاف نے لاہور میں داتا دربار میں اعتکاف بیٹھنے والوں کی فہرست جاری کر دی، انتظامیہ نے معتکفین کے ناموں کی فہرست احاطہ دربار میں آویزاں کر دی۔
ایڈمنسٹریٹر داتا دربار شیخ جمیل نے کہا ہے کہ سپیشل برانچ سے کلیئرنس ملنے والوں کے نام فہرست میں شامل کئے گئے ہیں، انتظامیہ نے 1600 افراد کے ناموں کی فہرست آویزاں کی۔
انہوں نے بتایا ہے کہ معتکفین کے لئے 4 سیکٹرز میں طعام و قیام کے انتظامات ہوں گے، تمام سیکٹرز میں 102 کیبن ہوں گے، ہر شہری کے سکیورٹی کارڈ پر کیبن درج ہو گا۔