حکومت نے غیر قانونی طورپر مقیم غیر ملکیوں کی وطن واپسی کی ڈیڈ لائن میں توسیع نہ کرنے کا فیصلہ کیا ہے۔
سکیورٹی ذرائع کے مطابق غیر قانونی طور پر مقیم غیر ملکیوں اور افغان سٹیزن کارڈ ہولڈر کی پاکستان چھوڑنے کی ڈیڈ لائن 31 مارچ ہے جس میں توسیع نہیں کی جائے گی۔
ذرائع کا بتانا ہے کہ مقررہ تاریخ کے بعد غیرقانونی طورپرمقیم غیرملکیوں کے خلاف قانونی کارروائی کی جائے گی اور ایسے افراد کو گرفتار کر کے ملک بدر کیا جائے گا۔
ذرائع کا بتانا ہے یہ فیصلہ پاکستان میں بڑھتی دہشت گردی کے واقعات میں افغان شہریوں کے براہ راست ملوث ہونے کے باعث کیا گیا، حال ہی میں 4 مارچ 2025 کو بنوں کینٹ خود کش حملوں میں فتنہ خوراج کے 16 دہشتگرد ہلاک ہوئے تھے، ہلاک خوارجیوں میں افغان دہشتگرد بھی شامل تھے، اس حملے کی منصوبہ سازی افغان سرزمین پر کی گئی تھی۔
وزارت داخلہ کے مطابق غیر قانونی طور پر مقیم غیر ملکیوں کی ملک بدری کا عمل یکم اپریل سےشروع کر دیا جائے گا۔
گزشتہ روز وزارت داخلہ کی جانب سے جاری بیان میں کہا گیا تھا کہ تمام غیرقانونی مقیم غیرملکی 31 مارچ تک رضاکارانہ طور واپسی یقینی بنائیں۔