سندھ حکومت نے صوبے بھر میں منافع خوروں کے خلاف کارروائی کا فیصلہ کرلیا۔
وزیراعلیٰ سندھ کے معاونین وقار مہدی اور عثمان ہنگورو کی زیر صدارت اجلاس ہوا جس میں صوبے کے تمام اضلاع میں منافع خوروں کے خلاف کارروائی کا فیصلہ کیا گیا۔
اجلاس میں وقار مہدی نے کہا کہ منافع خوروں کے خلاف کارروائی کیلئے تھانوں کے قیام کا فیصلہ کیا ہے، تھانوں میں محکمہ بیورو آف سپلائی اور پولیس کا علمہ شامل ہوگا۔
انہوں نے کہا کہ اشیائے خورونوش کی قیمتوں میں استحکام لانا اور ذخیرہ اندوزی روکنا چاہتے ہیں، اس کے علاوہ تمام گوداموں کو رمضان سے پہلے رجسٹرڈ کرنے کا فیصلہ بھی کیا گیا ہے، بچت بازاروں میں خصوصی اسٹال اور پھلوں کی مقررہ قیمتوں کو یقینی بنایا جائے جب کہ سبزی منڈیوں کے کولڈ اسٹوریج رجسٹرڈ اور ان کی نگرانی کی جائے گی۔
وقار مہدی کا کہنا تھاکہ نئے تھانے سندھ میں منافع خوروں کے خلاف کارروائی کرنے کے مجاز ہوں گے، صوبے بھر کی مارکیٹوں کی نگرانی کے لیے خصوصی ڈیوٹیاں لگانے کی ہدایت کردی ہے۔