وزیر داخلہ سندھ ضیا الحسن لنجار نےکہا ہے کہ چینی شہریوں کی سندھ ہائیکورٹ میں دائر پٹیشن قانونی طور پر درست نہیں۔
کراچی میں میڈیا سے گفتگو میں ضیا الحسن لنجار کا کہناتھاکہ غیر ملکی شہریوں کو فارن ایکٹ کو فالو کرنا چاہیے، چینی شہریوں کو بھی پروسیجر کو فالو کرنا چاہیے تھا۔
انہوں نے کہا کہ چینی شہریوں کی دائر پٹیشن قانونی طور پر درست نہیں، چینی شہریوں کو قونصل جنرل کے ذریعے اپروچ کرنا چاہیے تھا۔
وزیر داخلہ سندھ کا کہنا تھاکہ ان دو چینی شہریوں کی یہاں سرمایہ کاری نہیں، پولیس حکام نے چینی قونصل جنرل سے ملاقات کی، چینی قونصل جنرل سے ملاقات کروں گا تاکہ ان کا پالیسی بیان سامنے آئے۔
خیال رہے کہ گزشتہ دنوں چینی سرمایہ کار پولیس کے مبینہ طور پر ہراساں کرنے کے خلاف سندھ ہائیکورٹ پہنچ گئے تھے۔
درخواست میں مؤقف اپنایا گیا تھاکہ پولیس کی ہراسانی اور بھتاخوری سےبچایاجائے، ورنہ لاہوریا واپس چین چلےجائیں گے۔
درخواست میں الزام عائد کیا گیا تھا کہ ائیرپورٹ سے لے کر رہائش گاہ تک پولیس کی جانب سے رشوت طلب کی جاتی ہے، ائیرپورٹ پربلٹ پروف گاڑیوں کے نام پرگھنٹوں انتظار کرایا جاتا ہے اور رشوت دینے پر پولیس حکام اپنی گاڑیوں میں رہائش گاہ پہنچاتے ہیں۔
درخواست میں یہ الزام لگایا گیا تھاکہ رہائش گاہوں پر بھی سکیورٹی کے نام پر محصور کیا جاتا ہے اور باہر تالے لگائےجاتے ہیں، آزادانہ نقل و حرکت کے حق سے محروم کردیا گیا ہے، کاروباری میٹنگز نہیں کرسکتے۔
عدالت نے سماعت کے بعد نوٹس جاری کرتے ہوئے آئی جی سندھ اوردیگر سےچار ہفتوں میں جواب طلب کیا ہے۔