اسپین، ناروے اور آئرلینڈ کے نقوشِ قدم پر چلتے ہوئے اب یورپی ریاست سلووینیا نے بھی فلسطین کو تسلیم کرنے کا اعلان کیا ہے۔ سلووینیا کے وزیر اعظم رابرٹ گولوب نے ایک پریس کانفرنس میں کہا کہ فلسطینی عوام کا حقِ ریاست تسلیم کرنا بین الاقوامی اصولوں کے عین مطابق ہے۔
دارالحکومت جُبلجانا میں کی جانے والی پریس کانفرنس میں سلووینیا کے وزیرِاعظم کا کہنا تھا کہ تمام حالات و واقعات کا جائزہ لینے کے بعد فلسطینی ریاست کو تسلیم کرنے کا فیصلہ کیا گیا ہے۔ فلسطینیوں کا حقِ ریاست تسلیم کرنا اخلاقی ذمہ داری ہے۔
یاد رہے کہ گزشتہ روز برازیل نے غزہ آپریشن کے حوالے سے اختلافات اور بالخصوص رفح میں صیہونی بمباری کے خلاف احتجاج کے طور پر اپنا سفیر صیہونی حکومت سے واپس بلالیا تھا۔
صیہونی حکومت نے اپنے ردِعمل میں کہا کہ اسے برازیلین حکومت کی طرف سے اس فیصلے کی باضابطہ اطلاع نہیں دی گئی۔ کشیدگی دور کرنے کے لیے برازیلی سفارت خانے کے ناظم الامور کو صیہونی وزارتِ خارجہ میں طلب کیا۔
سلووینیا کی پارلیمںٹ کی اسپیکر اُرسکا کلیکوکر زوپانچ نے کہا کہ حکومت کے اس فیصلے کی پارلیمنٹ کے ذریعے توثیق لازم ہے۔ اس حوالے سے منگل کو رائے شماری ہوگی۔
صیہونی وزارتِ خارجہ نے امید ظاہر کی ہے کہ سلووینیا کی پارلیمنٹ حکومت کے اس فیصلے کی توثیق دینے سے گریز کرے گی۔ صیہونی وزیرِ خارجہ صیہونی حکومت کیٹز نے ایک بیان میں کہا کہ فلسطینی ریاست کو تسلیم کرنے کا مطلب حماس کو نوازنا ہوگا۔
یورپ کے متعدد ممالک فلسطینی ریاست کو تسلیم کرکے صیہونی حکومت پر دباؤ ڈالنے کی کوشش کر رہے ہیں تاکہ وہ غزہ میں بلا جواز فوجی آپریشن روک دے۔
یاد رہے کہ چینی صدر شی جن پنگ نے گزشتہ روز غزہ کے مسئلے پر بین الاقوامی کانفرنس بلانے کا مطالبہ کیا تھا تاکہ صیہونی فوجی کارروائی روکی جاسکے اور خطے میں حقیقی امن کی راہ ہموار ہو۔