ایم کیو ایم پاکستان کے مصطفی کمال، مسلم لیگ ن سندھ کے صدر بشیر میمن، جے یو آئی ف کے قاری عثمان اور جی ڈی اے کے راشد شاہ نے مردان ہاؤس میں شاہی سید سمیت اے این پی رہنماؤں سے ملاقات کے دوران انہیں اتحاد میں شامل ہونے کی دعوت دی۔
مسلم لیگ ن سندھ کے صدر بشیر میمن نے کہا کہ لوگ سمجھتے ہیں کہ پیپلز پارٹی کے سوا سندھ میں کوئی آپشن نہیں لیکن ہم عوام کیلئے امید کی کرن ہیں آئندہ سندھ حکومت ہم بنائیں گے۔
ن لیگ، ایم کیو ایم اور اتحادیوں نے خود کو سندھ میں پی پی کے متبادل کے طور پر پیش کر دیا، نگران وزیر اعلیٰ سے مطالبہ کرتے ہیں کہ ہمیں لیول پلیئنگ فیلڈ دی جائے، صوبائی الیکشن کمشنر بھی اپنی عزت کا خیال کرے۔
بشیر میمن کا کہنا تھا کہ آج سندھ میں لوگوں کو پینے کا صاف پانی تک میسر نہیں، کراچی ترقی کرے گا تو سندھ ترقی کرے گا۔
اے این پی کے رہنما شاہی سید نے کہا کہ تمام جماعتیں چاہتی ہیں کہ سندھ سے بھتہ خوری اور کرپشن کا خاتمہ ہو جبکہ ایم کیو ایم پاکستان کے رہنما مصطفی کمال کا کہنا تھا کہ پیپلز پارٹی کی حکومت نے صوبے کو خاک اور مٹی کا گہوارہ بنا دیا ہے۔