اسلام آباد:
ملک بھر میں آج یوم پاکستان کے 85 برس مکمل ہونے کا دن ملی جوش و جذبے کے ساتھ منایا جا رہا ہے۔
ایکسپریس نیوز کے مطابق رمضان المبارک کی وجہ سے 23 مارچ کو یوم پاکستان کی تقریبات کو محدود پیمانے پر روایتی ملی جوش و جذبے کے ساتھ منعقد کیا جا رہا ہے۔
دن کا آغاز توپوں کی سلامی سے ہوا، جس میں لاہور میں 21 جبکہ وفاقی دارالحکومت اسلام آباد میں 31 توپوں کی سلامی دی گئی۔
لاہور کے محفوظ شہید گیریژن میں پاک فوج کے چاک و چوبند جوانوں نے توپوں کی سلامی دی۔ اس موقع پر جوانوں نے نعرہ تکبیر "اللہ اکبر” اور "پاکستان زندہ باد” کے فلک شگاف نعرے بھی لگائے، جس سے فضا قومی جذبات سے گونج اٹھی۔
یوم پاکستان کے موقع پر ملک کی ترقی، خوشحالی، امن اور سلامتی کے لیے خصوصی دعائیں بھی کی گئیں۔ نماز فجر کے بعد مختلف مساجد میں علمائے کرام اور نمازیوں نے ملک کی سربلندی اور سلامتی کے لیے دعائیں مانگیں۔
رواں سال یوم پاکستان کی مرکزی تقریب روایتی پریڈ کو محدود پیمانے پر ایوان صدر کے احاطے میں منعقد کرنے کا فیصلہ کیا گیا ہے، جس میں پاکستان کی تینوں مسلح افواج کے دستے بھرپور شرکت کریں گے۔
صدر مملکت آصف علی زرداری تقریب کے مہمان خصوصی تھے، مسلح افواج کے دستے نے انہیں سلامی پیش کی۔ پاک فضائیہ کے لڑاکا طیاروں نے بھی ایوانِ صدر کے سامنے فلائی پاسٹ کیا جبکہ پاکستان آرمی کا مایہ ناز پائپ اینڈ پرکشن بینڈ نے اپنے فن کا مظاہرہ کیا۔
تقریب میں غیر ملکی سفراء اور دیگر اہم شخصیات نے بھی شرکت کی۔ یوم پاکستان کی یہ تقریبات ملک بھر میں قومی یکجہتی اور جذبہ حب الوطنی کی عکاس ہے۔
لاہور میں شاعر مشرق ڈاکٹر علامہ محمد اقبال کے مزار پر گارڈ کی تبدیلی کی پُروقار تقریب منعقد ہوئی۔ پاک فضائیہ کے چاک و چوبند دستے نے پنجاب رینجرز کی جگہ اعزازی گارڈز کی ذمہ داری سنبھالی۔ تقریب میں سول اور عسکری حکام بھی شریک ہوئے، جبکہ ایئر وائس مارشل اختر عمران سدوزئی مہمان خصوصی تھے۔
ایئر وائس مارشل اختر عمران سدوزئی نے پریڈ کا معائنہ کیا، ایئر فورس اور رینجرز کے چاک و چوبند دستے نے انہیں سلامی دی، ایئر وائس مارشل اختر عمران سدوزئی نے مزار اقبال پر پھول چڑھائے اور فاتحہ خوانی کی۔
ایئر وائس مارشل اختر عمران سدوزئی نے مزار اقبال پر مہمانوں کی کتاب میں اپنے تاثرات قلمبند کیے۔
یوم پاکستان کے موقع پر روایتی جوش و جذبے کے ساتھ لاہور کے واہگہ بارڈر اور قصور کے گنڈا سنگھ والا بارڈر پر بھی بیٹ ریٹریٹ تقریبات منعقد ہوں گی۔ ان تقریبات میں پاک فوج، رینجرز اور عوام کی بڑی تعداد شریک ہوگی، جو قومی پرچم کو سلامی دے کر مادر وطن سے اپنی محبت کا اظہار کریں گے۔